ލާމަރުކަޒީ ގާނޫނަށް ގެނައި އިސްލާހާއެކު އަތޮޅު ކައުންސިލްތައް އުވާލުމާ ގުޅިގެން، ރާއްޖޭގެ ކޮންމެ އަތޮޅެއްގައި ލޯކަލް ގަވަރމަންޓް އޮތޯރިޓީ (އެލްޖީއޭ) ގެ އޮފީހެއް ގާއިމްކުރުމަށް ސަރުކާރުން ނިންމައިފިއެވެ.
ލާމަރުކަޒީ ގާނޫނަށް ގެނައި އިސްލާހާއެކު، އަތޮޅު ކައުންސިލަރުންގެ ދައުރު އިއްޔެއަށް ވަނީ ހަމަވެފައެވެ. އަތޮޅު ކައުންސިލްތައް އުވާލުމާ ގުޅިގެން އިދާރީ ދާއިރާތަކުގައި އެލްޖީއޭގެ ހިދުމަތްތައް މެދުނުކެނޑި ކުރިއަށްގެންދިއުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވަރަށް މުހިންމު ނިންމެވުންތަކެއް ނިންމަވައިފައެވެ.
ލާމަރުކަޒީ ގާނޫނުގެ ދަށުން އެލްޖީއޭގެ ހިދުމަތްތައް އިދާރީ ދާއިރާތަކުގައި ދިނުމަށް ގާއިމްކުރާ މި އިދާރާތަކަކީ ސަރުކާރުގެ ވަކި އިދާރާއެއްގެ ގޮތުގައި ގާއިމްކުރާ އިދާރާތަކެއް ނޫންކަމުން އެ އިދާރާތަކަށް ކިޔާނެ ތަފާތު ވަކި ނަމެއް ރައީސް މުޢިއްޒު ވަނީ ހަމަޖައްސަވައިފައެވެ. މި އޮފީސްތަކަށް ކިޔުމަށް ރައީސް ހަމަޖެއްސެވި ނަމަކީ ”ލޯކަލް ގަވަމަންޓް އޮތޯރިޓީ – (އަތޮޅުގެ ނަން) އޮފީސް“ އެވެ.
އަތޮޅު ކައުންސިލްތައް އުވާލި ނަމަވެސް، އެ އިދާރާތަކުގައި މަސައްކަތްކުރާ އެއްވެސް މުވައްޒަފެއްގެ ވަޒީފާ ނުގެއްލޭނެ ކަމަށާއި އަދި އެއްވެސް މުވައްޒަފަކަށް މިހާރު ލިބެމުންދާ މުސާރައާއި އިނާޔަތްތަކަށް އުނިކަމެއް ނާންނާނެކަމުގެ ޔަގީންކަން އެލްޖީއޭއިން ވަނީ ދީފައެވެ. މީގެ އިތުރުން ކަމާބެހޭ އިދާރާތަކާ މަޝްވަރާކޮށްގެން މިކަންކަން ހަރުދަނާކުރެއްވުމަށް ރައީސް ވަނީ އިރުޝާދު ދެއްވައިފައެވެ.
