މި އަހަރުގެ ޛުލްޙިއްޖާ މަހުގެ ފުރަތަމަ ދުވަހަކީ މިއަދު ކަމަށް ސަޢުދީ ޢަރަބިއްޔާގެ ސަރުކާރުން އިއުލާންކޮށްފިއެވެ.
ސަޢުދީ ސަރުކާރުން ނެރުނު އިއުލާނުގައި ބުނެފައިވަނީ، ޛުލްޙިއްޖާ މަހުގެ ފުރަތަމަ ދުވަހަކީ މިއަދު ކަމަށް ކަނޑައެޅީ ޙައްޖު މަހުގެ ހަނދު ރޭގެ ވަގުތެއްގައި އެ ގައުމަށް ފެނިފައިވާތީ ކަމަށެވެ.
އެހެންކަމުން އަރަފާތު ދުވަސް ވާނީ މި މަހުގެ 26 ވަނަ ދުވަހަށް ކަމަށާއި އަޟްޙާ ޢީދު ދުވަސް ވާނީ މި މަހުގެ 27 ވަނަ ދުވަހަށް ކަމަށް ސަޢުދީ ސަރުކާރުން ވަނީ ޔަގީންކޮށްދީފައެވެ. ފާހަގަކޮށްލަންޖެހޭ ގޮތުގައި ހިޖުރީ ކަލަންޑަރުން ވެސް ދައްކަނީ މިއަދަކީ ޛުލްޙިއްޖާ މަހުގެ ފުރަތަމަ ދުވަސް ކަމަށެވެ.
ޙައްޖުގެ މަތިވެރި އަޅުކަން އަދާކުރުމަށް މި އަހަރު ދިވެހިރާއްޖެއިން ސަޢުދީއަށް ދިއުމަށް ހަމަޖެހިފައިވާ ހަތަރު ގުރޫޕުގެ ތެރެއިން ދެ ގުރޫޕެއް އިއްޔެ ސަޢުދީއަށް ގޮސްފައިވާއިރު މިއަދުގެ ވަގުތެއްގައި ތިންވަނަ ގުރޫޕް ވެސް ވަނީ ފުރުމަށް ހަމަޖެހިފައެވެ. އަދި މާދަމާގެ ވަގުތެއްގައި ބާކީ ތިބި ޙައްޖާޖީން ސަޢުދީއަށް ފުރުމަށް ވަނީ ހަމަޖެހިފައެވެ.
އެހެން އަހަރުތަކެކޭ އެއްގޮތަށް މި އަހަރު ވެސް ދިވެހިރާއްޖެއިން ޙައްޖުގެ މަތިވެރި އަޅުކަން އަދާކުރުމަށް ސަޢުދީއަށް ދިއުމަށް ހަމަޖެހިފައިވަނީ 1،000 ޙައްޖާޖީންނެވެ.
