މި އަހަރުގެ ޙައްޖުގެ މަތިވެރި އަޅުކަން އަދާކުރުމަށް ދިވެހިރާއްޖެއިން ފުރުމަށް ހަމަޖެހިފައިވާ ޙައްޖާޖީންގެ ތެރެއިން މިއަދު ފުރި 260 ޙައްޖާޖީންނަށް ސަޢުދީ ޢަރަބިއްޔާއިން ހޫނު މަރުހަބާއެއް ކިޔައިފިއެވެ.
ދިވެހި ޙައްޖާޖީންގެ ދެވަނަ ގުރޫޕް ސަޢުދީ ޢަރަބިއްޔާއަށް ފުރާފައިވަނީ މިއަދު ހެނދުނު 08:00 އެހާއިރުއެވެ. މި ފްލައިޓް ޖިއްދާގެ ކިންގް އަބްދުލްޢަޒީޒް އިންޓަރނޭޝަނަލް އެއަރޕޯޓަށް ޖައްސާފައިވަނީ މިއަދު މެންދުރުފަހު 13:00 އެހާއިރުއެވެ. ޙައްޖާޖީންގެ ދެވަނަ ގުރޫޕް ސަޢުދީއަށް ދިޔުމުން އެ ފަރާތްތަކަށް މަރުހަބާ ކިޔާފައިވަނީ އެ ގައުމުގެ ސަރުކާރުގެ ޙައްޖުގެ ކަންކަމާ ގުޅޭ އިސްވެރިންނާއި، ދިވެހި ޙައްޖު މިޝަންގެ އިސްވެރިންގެ އިތުރުން މައްކާ ރޫޓު އިނީޝިއޭޓިވްގެ ފަރާތުންނެވެ.
ދިވެހިރާއްޖެއަށް މި އަހަރު 1،000 ޙައްޖު ކޯޓާ ލިބިފައިވާއިރު، މި ހުރިހާ ޙައްޖާޖީން ފުރުމަށް ހަމަޖެހިފައިވަނީ ސަޢުދީގެ ދެ ފްލައިޓާއި މޯލްޑިވިއަންގެ ދެ ފްލައިޓުގައެވެ. މިހާތަނަށް ދެ ފްލައިޓް ފުރާފައިވާއިރު، ބާކީ ތިބި ޙައްޖާޖީން ފުރުމަށް ހަމަޖެހިފައިވަނީ އަންނަ ހޯމަ އަދި އަންގާރަ ދުވަހުއެވެ. އެގޮތުން މާދަމާ 268 ޙައްޖާޖީން ފުރުމަށް ހަމަޖެހިފައިވާއިރު އޭގެ އަނެއް ދުވަހު ފުރުމަށް ހަމަޖެހިފައިވަނީ 253 ޙައްޖާޖީންނެވެ.
ދިވެހި ޙައްޖާޖީންނަށް ފުރިހަމަ ހިދުމަތްތަކެއް ފޯރުކޮށްދިނުމުގެ ގޮތުން ދިވެހި ސަރުކާރުން ސަޢުދީ ސަރުކާރާއި ގުޅިގެން ވަރަށް ގިނަ މަސައްކަތްތަކެއް ކުރަމުން އަންނަކަން ފާހަގަކޮށްލެވެއެވެ. އެގޮތުން ޙައްޖާޖީން ތިބޭ ޓެންޓުތަކުގައި ފާހާނަ ބަރި އިތުރުކުރުމާއި ކެއިންބުއިމުގެ އިންތިޒާމުތައް ހަރުދަނާކުރުން ހިމެނެއެވެ.
މޯލްޑިވްސް ޙައްޖު މިޝަންއިން ބުނީ، މިހާތަނަށް ސަޢުދީއަށް ދިޔަ ދިވެހި ޙައްޖާޖީންގެ ހާލުވެސް ރަނގަޅު ކަމަށާއި، މިހާރު އެ ފަރާތްތަކުން ދަނީ ފުރަތަމަ ޢުމްރާގެ އަޅުކަން ފުރިހަމަކުރަމުން ކަމަށެވެ.
