މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަކީ ކޮންމެ ރައްޔިތެއްގެވެސް ފަރުދީ ޒިންމާއެއް ކަމަށް ވިދާޅުވެ، މަގުމަތީގެ ގަވާއިދުތަކަށް ފުރިހަމައަށް ބޯލެނބުމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފު އިލްތިމާސް ކުރައްވައިފިއެވެ.
ނައިބު ރައީސް މިކަމަށް އިލްތިމާސް ކުރެއްވީ މިއަދު އެމަނިކުފާނުގެ ފޭސްބުކް މީސްމީޑިއާ މަންސައިގައި ކުރެއްވި ޕޯސްޓެއްގައެވެ
އެ ޕޯސްޓުގައި ނައިބު ރައީސް ވިދާޅުވީ، ރައްކާތެރިކަމާއެކު މަގުމަތި ބޭނުންކުރުމަކީ އަނެކާގެ ސަލާމަތާއި ރައްކާތެރިކަމަށްޓަކައި ތިމާގެ ފަރާތުން ކޮށްދެވޭނެ އެންމެ މުހިންމު އެއް ކަންތައް ކަމަށެވެ. އަދި މަގުމަތީގައި ފަރުވާކުޑަކުރުމާއި ނުރައްކާތެރިކޮށް އުޅަނދު ދުއްވުމަކީ އޭގެ ސަބަބުން ހިނދުކޮޅެއްގެ ތެރޭގައި ތިމާއާއި އަނެކާގެ ދިރިއުޅުން އަބަދުގެ އަބަދަށް ބަދަލުކޮށްލަފާނެ ނުރައްކާތެރި ކަމެއްކަން އެމަނިކުފާނު ފާހަގަކުރެއްވިއެވެ.
”މަގުމަތި ބޭނުންކުރާ އެންމެންގެ ސަލާމަތަށްޓަކައި ޒިންމާދާރުކަމާއެކު، މަގުމަތީގެ ގަވާއިދުތަކަށް ފުރިހަމައަށް ބޯލަނބައި، ރައްކާތެރިކަން އިސްކުރަން ހުރިހާ ރައްޔިތުންނަށް އިލްތިމާސްކުރަން،“ ނައިބު ރައީސްގެ ޕޯސްޓުގައި ވިދާޅުވެފައިވެއެވެ.
މަގުމަތީގެ ސަލާމަތާ ގުޅޭގޮތުން ނައިބު ރައީސް މިފަދަ އިލްތިމާސެއް ކުރައްވާފައިވާއިރު، ރާއްޖޭގެ މަގުތަކުގައި ހިނގާ އެކްސިޑެންޓުތަކުގެ އަދަދު ވަނީ ވަރަށް ބޮޑަށް އިތުރުވެފައެވެ. އެގޮތުން ތަފާސްހިސާބުތަކަށް ބަލާއިރު، މިދިޔަ އޭޕްރީލް މަހުގެ ނިޔަލަށް އެކްސިޑެންޓުތަކުގެ 1064 މައްސަލަ ފުލުހުންނަށް ވަނީ ރިޕޯޓު ކޮށްފައެވެ.
ރައްކާތެރިކަމާއެކު މަގުމަތި ބޭނުންކުރުމަކީ ކޮންމެ ރައްޔިތެއްގެވެސް ފަރުދީ ޒިންމާއެއް. އެއީ އަނެކާގެ ސަލާމަތާއި ރައްކާތެރިކަމަށްޓައި ތިމާގެ ފަރާތުން ކޮށްދެވޭނެ އެންމެ މުހިންމެ އެއް ކަން. ފަރުވާކުޑަކަމާއި ނުރައްކާތެރިކޮށް ދުއްވުމަކީ، ހިނދުކޮޅެއްގެ ތެރޭގައި ތިމާއާއި އަނެކާގެ…
— Hussain Mohamed Latheef (@HucenSembe) May 17, 2026
ނައިބު ރައީސް މިފަދަ އިލްތިމާސެއް ކުރައްވާފައި މިވަނީ، މަގުމަތީގެ އެކްސިޑެންޓްތައް މަދުކުރުމަށާއި މަގުތަކަކީ އެންމެނަށް އަމާން ތަނަކަށް ހެދުމަށް ސަރުކާރުން ގިނަ މަސައްކަތްތަކެއް ކުރައްވަމުން ގެންދަވާ ދަނޑިވަޅެއްގައެވެ.
