ރަޝިޔާގެ ކަމާބެހޭ ފަރާތްތަކާ ހަވާލާދީ ލޯކަލް ނޫސްތަކުން ރިޕޯޓުކޮށްފައިވާ ގޮތުގައި 2022 ވަނަ އަހަރު ހަނގުރާމަ ފެށުނު ފަހުން ޔޫކްރޭނުން ރަޝިޔާއަށް ދިން އެންމެ ބޮޑު އެއް ޑްރޯން ހަމަލާގައި، މޮސްކޯ ކައިރިން 3 މީހުންނާއެކު ޖުމްލަ 4 މީހުން ވަނީ މަރުވެފައެވެ. ޔޫކްރޭނުން ވަނީ ރޭ ދަންވަރުގައި ރަޝިޔާގެ ވެރިރަށް މޮސްކޯ ހިމެނޭހެން އެކި ސަރަހައްދު ތަކަށް އަމާޒުކޮށް 550 އަށްވުރެން ގިނަ ޑްރޯން ފޮނުވާލާފައެވެ.
އެ ސަރަހައްދުގެ ގަވަރުނަރު އެންޑްރޭ ވޮރޮބްޔޭވް ބުނެފައިވާ ގޮތުގައި، ޔޫކްރޭނުގެ ޑްރޯންތަކުން ވަނީ ބައެއް އަސާސީ ވަސީލަތްތަކަށް އަދި އުސް ބައެއް އިމާރާތްތަކަށް ގެއްލުންދީފައެވެ. މޮސްކޯގެ މޭޔަރު ސަރްގޭ ސޮބްޔާނިން ޚަބަރު ދީފައިވާ ގޮތުގައި، މޮސްކޯ ސިޓީގެ ތެރޭގައި ރޭގަނޑު ދިން މި ހަމަލާގައި މަދުވެގެން 12 މީހުންނަށް އަނިޔާވެފައިވާއިރު، މީގެ ތެރެއިން ގިނަ މީހުންނަށް އަނިޔާވީ އެ ސިޓީގެ ތެޔޮ ސާފުކުރާ ކާރުޚާނާ ކައިރީގައެވެ. ނަމަވެސް އެ ކާރުޚާނާގެ ”ޓެކްނޮލޮޖީ“ އަށް އެއްވެސް ގެއްލުމެއް ލިބިފައިނުވާ ކަމަށް ސޮބްޔާނިން ބުނެފައި ވެއެވެ.
ރަޝިޔާގެ ދައުލަތުގެ މީޑިއާ އެޖެންސީ ”ޓާސް“ އިން ސޮބްޔާނިންއާ ހަވާލާދީ ބުނި ގޮތުގައި، ރޭގަނޑު މޮސްކޯއާ ދިމާލަށް ދަތުރުކުރި 81 ޑްރޯނެއް ރަޝިޔާގެ ދިފާއީ ބާރުތަކުން ވަނީ ވައްޓާލާފައެވެ. މިއީ 2022 ވަނަ އަހަރުގެ ފެބްރުއަރީ 24 ގައި ރަޝިޔާއިން ޔޫކްރޭނަށް އަރައި ހަމަލާދޭން ފެށި ފަހުން ރަޝިޔާގެ ވެރިރަށަށް އަމާޒުކޮށް ދިން އެންމެ ބޮޑު އެއް ހަމަލާއެވެ.
