ޑިމޮކްރެޓިކް ރިޕަބްލިކް އޮފް ކޮންގޯ އަދި ޔުގެންޑާގައި ފެތުރެމުންދާ އިބޯލާ ކޭސްތަކަކީ ”ބައިނަލްއަގުވާމީ ގޮތުން ސަމާލުކަންދޭންޖެހޭ އާންމު ސިއްހަތުގެ ކުއްލި ނުރައްކަލުގެ ހާލަތެއް“ ކަމަށް ދުނިޔޭގެ ސިއްހަތު ޖަމްއިއްޔާ، ޑަބްލިއުއެޗްއޯ، އިން މިއަދު ދުވަހު ކަނޑައަޅައިފިއެވެ. އަދި މީގެ ސަބަބުން އަވަށްޓެރި ގައުމުތަކަށް ނުރައްކާ އެބައޮތް ކަމަށްވެސް އެ ޖަމްއިއްޔާއިން ބުނެފައިވެއެވެ.
ޑަބްލިއުއެޗްއޯއިން ބުނި ގޮތުގައި، ”ބުންޑިބުގްޔޯ“ ވައިރަހުގެ ސަބަބުން ފެތުރޭ މި ބަލިމަޑުކަމަކީ މުޅި ދުނިޔެއަށް ފެތުރޭ ފަދަ އާލަމީ ބަލިމަޑުކަމެއްގެ ކުއްލި ނުރައްކަލުގެ މިންގަނޑުތަކަށް ފެތޭ ކަމެއް ނޫނެވެ. ނަމަވެސް ކޮންގޯގެ ބޯޑަރު ހިއްސާކުރާ ގައުމުތަކަށް މި ބަލި އިތުރަށް ފެތުރުމުގެ ބޮޑު ނުރައްކަލެއް އެބައޮތެވެ.
އދ. ގެ ސިއްހަތާ ބެހޭ އެޖެންސީން ނެރުނު ބަޔާނެއްގައި ބުނެފައިވަނީ، ހޮނިހިރު ދުވަހާ ހަމައަށް ކޮންގޯގެ އީތޫރީ ޕްރޮވިންސްގެ މަދުވެގެން ތިން ހެލްތު ޒޯނަކުން ބަލި ޖެހިގެން މަރުވި ކަމަށް ޝައްކުކުރެވޭ 80 މީހުންނާއި، ލެބޯޓްރީން ކަށަވަރު ކުރެވުނު 8 ކޭސް އަދި ބަލި ޖެހިފައިވާ ކަމަށް ޝައްކުކުރެވޭ 246 ކޭސް ރިޕޯޓްކޮށްފައިވާ ކަމަށެވެ.
