ޤައުމީ ދިފާޢީ ބާރުގެ ހިތްވަރުގަދަ ޑައިވަރު، ސްޓާފް ސާޖަންޓް މުޙައްމަދު މަހުދީ ނިޔާވި ޚަބަރާ ގުޅިގެން އިޓަލީވިލާތުގެ ޚާރިޖީ ވަޒީރު އެންޓޯނިއޯ ޓަޔާނީ، ދިވެހިރާއްޖޭގެ ޚާރިޖީ ވަޒީރު އިރުތިޝާމް އާދަމްއަށް ތަޢުޒިޔާގެ މެސެޖެއް ފޮނުއްވައިފިއެވެ.
ސްޓާފް ސާޖަންޓް މުޙައްމަދު މަހުދީ ނިޔާވީ ވ. އަތޮޅުގައި ފީނަން ގޮސް އުޅުމުގެ ތެރޭގައި ގެއްލުނު އިޓަލީވިލާތުގެ ފަތުރުވެރިން ހޯދުމުގެ މަސައްކަތުގައި އުޅުއްވަނިކޮށެވެ. އިޓަލީގެ ޚާރިޖީ ވަޒީރުގެ މެސެޖުގައި، މި ހާދިސާގައި ގެއްލުނު އިޓަލީގެ ފަސް ޑައިވަރުންގެ ތެރެއިން އެކަކު ނިޔާވެ، އިތުރު ހަތަރު މީހަކު ގެއްލުމާ ގުޅިގެން ރާއްޖޭގެ ޚާރިޖީ ވަޒީރު ފޮނުއްވި ތަޢުޒިޔާގެ މެސެޖަށް ވަނީ ޝުކުރު އަދާކުރައްވާފައެވެ.
އެންޓޯނިއޯ ޓަޔާނީ ވިދާޅުވީ، ގެއްލިފައިވާ އިޓަލީގެ ފަތުރުވެރިން ހޯދުމުގެ މަސައްކަތުގައި އުޅުއްވި ދިވެހި ސިފައިންގެ ބޭކަލަކު ނިޔާވި ޚަބަރަކީ، އިޓަލީވިލާތަށް މިވަގުތު ކުރިމަތިވެފައިވާ ހިތާމަވެރި ދުވަސްތަކަށް އިތުރު ހިތްދަތިކަމެއް ގެނެސްދިން ކަމެއް ކަމަށެވެ. އަދި މި ހިތާމައިގައި ބައިވެރިވެވަޑައިގެން، އިޓަލީ ސަރުކާރާއި ރައްޔިތުންގެ ނަމުގައި، އަދި އެ މަނިކުފާނުގެ އަމިއްލަ ނަންފުޅުގައި ދިވެހި ސަރުކާރަށާއި، ޤައުމީ ދިފާޢީ ބާރަށާއި، ދިވެހި ރައްޔިތުންނަށް ވަނީ ތަޢުޒިޔާ ވިދާޅުވެފައެވެ.
މި ހިތާމަވެރި ހާދިސާގެ ސަބަބުން އަސަރުކޮށްފައިވާ ދެ ޤައުމުގެ ޢާއިލާތަކަށް ކެތްތެރިކަން ދެއްވުމަށް އެދިވަޑައިގަންނަވަމުން، އިޓަލީގެ ޚާރިޖީ ވަޒީރު ވަނީ ގެއްލުނު ފަތުރުވެރިން ހޯދުމުގައި ރާއްޖޭގެ ކަމާބެހޭ އިދާރާތަކުން ކުރަމުންދާ ބުރަ މަސައްކަތްތައް ފާހަގަކުރައްވައި ޝުކުރު އަދާކުރައްވާފައެވެ.
މީގެ އިތުރުން، ފަތުރުވެރިން ހޯދުމަށް ކުރިއަށްގެންދާ ޚާއްޞަ އޮޕަރޭޝަނުގައި އިޓަލީވިލާތުގެ ސަރުކާރުގެ ފުރިހަމަ އެހީތެރިކަމާއި އެއްބާރުލުން ފޯރުކޮށްދެއްވުމަށް ތައްޔާރަށް ތިއްބެވިކަމަށްވެސް އެ މަނިކުފާނުގެ މެސެޖުގައި ބަޔާންކުރައްވާފައިވެއެވެ.
