ތަފާތު ގިނަ ހަރަކާތްތަކާއެކު ”އަވަށްޓެރި މޫދު މަހާސަމާ“ ކުރިއަށް ގެންގޮސްފިއެވެ. މެއި 16 ވަނަ ދުވަހުގެ ހެނދުނު 9:30 އިން ފެށިގެން 16:30 އަށް މި ހަރަކާތްތައް ކުރިއަށް ގެންގޮސްފައި ވަނީ ހުޅުމާލެ ފޭސް 1 އަކުއަރ އެެރީނާ ވޯޓަރ ޕާކުގައެވެ.
ޕަބްލިކް ޓްރަސްޓް އެންޑް ކޮންފިޑެންސް މެނޭޖްމަންޓާއި ހުޅުމާލެ ފުލުހުންނާއި ފުލުހުންގެ އެހެނިހެން ޑިޕާޓްމަންޓުތައް ގުޅިގެން ކުރިއަށް ގެންދިޔަ މި ހަރަކާތްތަކުގައި އާންމު ރައްޔިތުންނާއި ގިނަ އަދަދެއްގެ ކުޑަކުދިން ބައިވެރިވެ، ވަރަށް ބޮޑު ތަރުހީބެއް ލިބިގެން ގޮސްފައިވާކަމަށް ފުލުހުން ބުނެފައިވެއެވެ.
މި ހަރަކާތުގައި، ފުލުހުންނާއި އާންމު ރައްޔިތުންގެ މެދުގައި އޮންނަ ގުޅުން އިތުރަށް ބަދަހިކޮށް އަދި މުޖުތަމައުގައި ހިނގާ ކުށްތަކާއި، ނޭދެވޭ ކަންކަމާ ގުޅޭގޮތުން، ހުޅުވާލެވިފައިވާ އެކުވެރި މާހައުލެއްގައި މައުލޫމާތު ހިއްސާކޮށްފައިވާކަމަށާއި، އަދި ކުޑަކުދިންނަށް ފުލުހުންގެ ފަރާތުން މުޖުތަމައުގައި ރައްކާތެރިކަން ލިބިފައިވާކަން އަންގައިދިނުމާއެކު، ފުލުހުންނަކީ އެކުވެރިކަމާއި އޯގާތެރިކަމާއެކު ކުދިންނަށް ރައްކާތެރިކަން ގާއިމުކޮށްދޭނެ ބައެއްކަން އުފާވެރި މާހައުލެއްގެ ތެރެއިން އެ ކުދިންނަށްް އަންގައިދީފައިވާކަމަށް ފުލުހުން ބުނެއެވެ.
މި ހަރަކާތުގައި، ކުޑަކުދިންނާއި އާއިލާތައް އެކުގައި ބައިވެރިވެވޭނެ ފަދަ، މޫދާއި އެއްގަމުގެ ތަފާތު ކުޅިވަރުތަކާއި ކުޑަކުދިންނަށް ހާއްސަ ކުޅިވަރުތައް ވެސް ކުރިއަށް ގެންގޮސްފައިވެއެވެ. އަދި ހޭލުންތެރިކުރުވުމަށް މައުލޫމާތު ދިނުމާއި ހާއްސަ ގޮތެއްގައި ރައްކާތެރިކަމާއެކު މޫދުގައި އުޅޭނެ ގޮތް ކުޑަކުދިންނަށް ކިޔައިދީފައިވެއެވެ.
މި ހަރަކާތްތަކުގައި ބައިވެރިވި ކުދިންގެ ތެރެއިން ގުރުއަތުން ހޮވުނު ކުދިންނަށް ގިފްޓް ވައުޗަރ ހަވާލުކޮށްފައިވެއެވެ. އަދި ކާމިޔާބުކަމާއެކު މި ހަރަކާތް ކުރިއަށް ގެންދިއުމަށް އެކި ގޮތްގޮތުން އެހީތެރިވެދިން ފަރާތްތަކުގެ އަގުވަޒަންކޮށް ހަނދާނީ ފިލާ ދީފައިވެއެވެ.
މި ހަރަކާތް ކާމިޔާބުކުރުމަށް އެހީތެރިކަން ފޯރުކޮށްދެއްވި ހުރިހާ ފަރާތްތަކަށް ވެސް ފުލުހުންގެ ޚިދުމަތުން ހާއްސަ ޝުކުރެއް ވަނީ ދަންނަވާފައެވެ.
ފުލުހުން ބުނީ މިފަދަ ހަރަކާތްތަކުގެ ސަބަބުން، ރައްކާތެރި މާހައުލެއްގައި ހިތްހަމަޖެހޭ އުފާވެރި ވަގުތުކޮޅެއް ހޭދަކުރުމުގެ ފުރުސަތު އާއިލާތަކަށް ލިބިގެންދިއުމުގެ އިތުރުން ފުލުހުންނާއި އާންމު ރައްޔިތުންނާއި އެހެނިހެން ފަރާތްތަކުގެ މެދުގައި އޮންނަ ގުޅުން ބަދަހިވެ ކުށްމަދު އަމާން މުޖުތަމައެއް ގާއިމުކުރުމަށް ވެސް މަގުފަހިވެގެންދާ ކަމަށެވެ.
ކޮންމެ އަހަރަކު ވެސް ކުރިއަށް ގެންދާ މި ހަރަކާތަކީ ރައްޔިތުންގެ މެދުގައި އިޖުތިމާއީ ގުޅުން ބަދަހިކޮށް، އެއްބަޔަކު އަނެއްބަޔަކަށް ދެކެފަރިތަވެ އަދި ދުޅަހެޔޮ ސިއްހަތެއްގައި ތިބުމަށް ބާރުއެޅުމާއި އުފާވެރި މާހައުލެއްގައި އާއިލާއާ އެކު ވަގުތު ހޭދަކުރުމުގެ މަގުފަހިކޮށްދިނުމަށް ފުލުހުންގެ ޚިދުމަތުން ކުރިއަށް ގެންދާ ހަރަކާތެކެވެ.
