މި އަހަރުގެ ޙައްޖުގެ އަޅުކަން އަދާކުރުމަށް ރާއްޖެއިން ފުރި ފުރަތަމަ ގްރޫޕްގައި ހިމެނޭ 238 ޙައްޖާޖީންނަށް ސަޢުދީ ޢަރަބިއްޔާއިން ހޫނު މަރުހަބާއެއް ކިޔައިފިއެވެ.
ދިވެހި ޙައްޖާޖީންގެ ފުރަތަމަ ގްރޫޕް ސަޢުދީ ޢަރަބިއްޔާއަށް ގޮސްފައިވަނީ ރޭގެ ވަގުތެއްގައެވެ. އެގޮތުން ޖިއްދާ އެއަރޕޯޓުން ޙައްޖާޖީންނަށް މަރުހަބާ ދެންނެވީ އެ ގައުމުގައި ހުންނަވާ ދިވެހި ސަފީރު އަޙްމަދު ސަރީރާއި މޯލްޑިވްސް ޙައްޖު މިޝަންގެ އިސް ބޭފުޅުންގެ އިތުރުން ސަޢުދީ ސަރުކާރުގެ މައްކާ ރޫޓް އިނީޝިއޭޓިވްގެ ޓީމުގައި ހިމެނި ވަޑައިގަންނަވާ ބޭފުޅުންނެވެ.
1447 ވަނަ އަހަރު ޙައްޖުގެ އަޅުކަން އަދާކުރުމަށް ފުރަތަމަ ފްލައިޓުން އައި ހުރިހާ ޙައްޖުވެރިން މިހާރު ވަނީ ހޮޓަލަށް އައިސްފަ. ހުރިހާ ޙައްޖުވެރިން ދެގެ ޙާލުވެސް ރަނގަޅު. pic.twitter.com/DOHdJW52mK
— Maldives hajj mission بعثة ا لحج ا المالديفية (@hajjmission_mv) May 15, 2026
ދިވެހި ޙައްޖާޖީން މައްކާގައި ތިބުމަށް ހަމަޖެހިފައިވާ ހޮޓަލަށް ދިއުމުން، ޙައްޖު ކޯޕަރޭޝަނާއި، ޙައްޖު މިޝަނާއި، ރަވާފް މިނާ އަދި ދިވެހި ޙައްޖުވެރިންނަށް ހިދުމަތްދޭ މުތައްވިފް ގްރޫޕްގެ ފަރާތުން ވެސް ވަނީ މަރުހަބާ ކިޔައިފައެވެ.
މޯލްޑިވްސް ޙައްޖު މިޝަނުން މައުލޫމާތު ދީފައިވާ ގޮތުގައި، ފުރަތަމަ ފްލައިޓުން ސަޢުދީއަށް ދިޔަ ހުރިހާ ޙައްޖާޖީންގެ ހާލު ރަނގަޅު ކަމަށާއި މިހާރު އެ ހުރިހާ ފަރާތްތަކުން ވެސް ފުރަތަމަ އުމްރާގެ އަޅުކަން ފަށާފައިވާ ކަމަށެވެ. ފާހަގަކޮށްލެވޭ ގޮތުގައި މިދިޔަ އަހަރުތަކާ އަޅާ ބަލާއިރު މިއަހަރު ދިވެހި ޙައްޖާޖީންނަށް ވަނީ ހުރިހާ ވަސީލަތްތަކާއެކު ފުރިހަމަ އިންތިޒާމުތަކެއް ހަމަޖައްސައިދީފައެވެ.
މިއަހަރު ދިވެހި ޙައްޖާޖީން އުފުލުމަށް ހަމަޖެހިފައިވާ ބާކީ ފްލައިޓްތައް ފުރުމަށް ހަމަޖެހިފައިވަނީ މި މަހުގެ 17، 18 އަދި 19 ވަނަ ދުވަހުއެވެ.
