ކިއުބާގެ ޑީސަލް އަދި ފިއުލް އޮއިލްގެ ރިޒާވް އެއްކޮށް ހުސްވެއްޖެކަން އެ ގައުމުގެ އެނާޖީ މިނިސްޓަރު ވިސެންޓޭ ޑި ލާ އޯ ލެވީ ދައުލަތުގެ މީޑިއާ މެދުވެރިކޮށް އިޢުލާން ކޮށްފިއެވެ. މި އިޢުލާނާ ގުޅިގެން ބުދަ ދުވަހުގެ ހަވީރުގެ ވަގުތެއްގައި ވެރިރަށް ހަވާނާގައި ވަނީ ވަރުގަދަ މުޒާހަރާތަކެއް ފެށިފައެވެ.
މިނިސްޓަރުގެ އިޢުލާނުގައި އިތުރަށް ބުނެފައިވަނީ، ވެރިރަށުގެ ބައެއް ސަރަހައްދުތަކުން ދުވާލަކު 20 އާއި 22 ގަޑިއިރާ ދެމެދުގެ ވަގުތަކަށް ކަރަންޓުގެ ހިދުމަތް މެދުކެނޑެމުންދާ ކަމަށެވެ.
ކިއުބާއަށް އެންމެ ގިނައިން ތެޔޮ ފޯރުކޮށްދެމުންދިޔަ މެކްސިކޯ އަދި ވެނެޒުއޭލާއިން ވެސް، މިއަހަރުގެ ޖެނުއަރީ މަހުގައި ރައީސް ޓުރަމްޕު ނެރުނު އެގްޒެކެޓިވް އޯޑަރަށް ފަހު ކިއުބާއަށް ތެޔޮ ފޮނުވުން ވަނީ ހުއްޓާލާފައެވެ. އެ އަމުރުގައި ވަނީ ކިއުބާއަށް ތެޔޮ ފޮނުވާ ކޮންމެ ޤައުމަކަށް ޓެރިފް އިމްޕޯޓް ޑިއުޓީ ބޮޑުކުރާނެ ކަމުގެ އިންޒާރު ދީފައެވެ.
މިދިޔަ ހަފުތާގައި އަލިފްދާލުން ވަނީ މި ތެލުގެ ދަތިކުރުމުގެ ފިޔަވަޅަކީ ޣައިރުގާނޫނީ ފިޔަވަޅެއް ކަމަށް ބުނެފައެވެ. އަދި މީގެ ސަބަބުން ”ކިއުބާގެ ރައްޔިތުންގެ ތަރައްގީވުމުގެ ހައްގަށް ހުރަސްއެޅި، ކާބޯތަކެއްޗާއި، ތަޢުލީމާއި، ސިއްހަތާއި، އަދި ސާފު ބޯފެނާއި ނަރުދަމާގެ ހިދުމަތް ހޯދުމުގެ ހައްގުތަކަށް އުނިކަން އަންނަމުންދާ“ ކަމަށް ވެސް އަލިފުދާލުން ފާހަގަކޮށްފައިވެއެވެ.
