އެމްޑީޕީގެ ސިޔާސަތަކީ ”ބޮވެންވާނެ“ ކަމަށް ދެކި އެ ތަކެތި ހުއްދަކުރުން ކަމަށާއި ނަމަވެސް މި ސަރުކާރުގެ ސިޔާސަތަކީ މަސްތުވާތަކެތީ އެންމެ ކުޑަ މިންވަރަކީ ވެސް ހަރާމް އެއްޗެއް ކަމުގައި ދެކުން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މި މޭރުމުން ވިދާޅުވީ، ވެރިކަން ކުރާ މައި ޕާޓީ، ޕީއެންސީން ރޭ ކުރިއަށްގެންދިޔަ ހަރުގެ ޖަލްސާގައި ވާހަކަފުޅުދައްކަވަމުންނެވެ. އިދިކޮޅު އެމްޑީޕީގެ ސިޔާސަތުތަކާއި މި ސަރުކާރުގެ ސިޔާސަތުތައް އަޅާކިޔާލައްވަމުން އެމަނިކުފާނު ވިދާޅުވީ، މި ސަރުކާރުން އެންމެ ބޮޑު އިސްކަމެއްދެއްވައިގެން ކުރައްވާނެ މަސައްކަތަކީ މަސްތުވާތަކެތީގެ ވަބާއިން ގައުމު ސަލާމަތްކޮށްދެއްވުން ކަމަށެވެ.
އެގޮތުން މަސްތުވާތަކެތި އެތެރެކޮށް އޭގެ ވިޔަފާރިކުރާ ފަރާތްތަކަށް މަރުގެ އަދަބުދިނުމަކީ މީގެ ކުރީގެ އެއްވެސް ސަރުކާރަކަށް ކުރަން ނުކެރުނު ކަމެއްކަން ފާހަގަކުރައްވައި ރައީސް ވިދާޅުވީ، މި ސަރުކާރުން އެކަން ގާނޫނަކަށް ހަދާފައިވާ ކަމަށެވެ.
”އަޅުގަނޑުމެން ބޭނުމީ ހަގީގީ މާނައިގަ މިކަން ހައްލުކުރަން، އެހެންނަމަވެސް ކުރިން އޮތީ އެހެނެއް ނޫންތޯ. ކުރީގެ އެމްޑީޕީ ސަރުކާރުގެ ސިޔާސަތަކީ ބޮވެންވާނެ، ނުބޮއެ ނުވާނެ، އެންމެން އަބަދަކު ހަމައިގަ ތިބޭކަށް ނުޖެހޭނެ. އެއީ އެމްޑީޕީގެ ސިޔާސަތު. އެކަމު އަޅުގަނޑުމެން ގަބޫލުކުރާ ހަމައަކީ ކުޑަ މިންވަރެއް ވެސް މަސްތުވާ އެއްޗެއް ވާނީ ހަރާމް އެއްޗަކަށޭ،“ – ރައީސް ވިދާޅުވިއެވެ.
މީގެ އިތުރުން މަސްތުވާތަކެތީގެ ވަބާގައި ޖެހިފައިވާ ފަރާތްތަކަށް ދިމާވެފައިވާ ހާލަތަށް އިޝާރާތްކުރައްވައި ރައީސް ވިދާޅުވީ، އެފަދަ ފަރާތްތަކަށް ބޭނުންވާ ފަރުވާ އާއި ދީނީ ގޮތުން ދޭންޖެހޭ ފަތުވާތަކާއި އިރުޝާދުތައް ދެވޭނެ އިންތިޒާމުތައް ސަރުކާރުން ހަމަޖައްސަވައިދެއްވާނެ ކަމަށެވެ.
