މި ހިނގާ ރައްޔިތުންގެ މަޖިލީހުގެ ފުރަތަމަ ދައުރު މި މަހުގެ ނިޔަލަށް ދަންމާލުމަށް ފާސްކޮށްފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ދައުރު އިތުރުކުރަން ފާސްކޮށްފައިވަނީ، ޖަލްސާގައި ބައިވެރިވެވަޑައިގަތް 72 މެންބަރުންގެ ތެރެއިން 58 މެންބަރުންގެ އިއްތިފާގުންނެވެ. މަޖިލީހުގެ ދައުރު ދަންމާލުމާ ދެކޮޅަށް ވޯޓު ދެއްވާފައިވަނީ އިދިކޮޅު އެމްޑީޕީގެ 11 މެންބަރުންނާއި، އައްޑޫ މީދޫ ދާއިރާގެ އަމިއްލަ މެންބަރު ޢަބްދުއްރަޙްމާނާއެކު ޖުމުލަ 12 މެންބަރުންނެވެ.
ގާނޫނުއަސާސީގެ 83 ވަނަ މާއްދާގައިވާ ބަޔާންކޮށްފައިވާ ގޮތުގައި، މަޖިލީހުގެ ޖަލްސާތައް އަހަރެއްގެ ތެރޭގައި ބެހިގެންވާނީ ތިން ދައުރުގެ މައްޗަށެވެ. އެގޮތުން މަޖިލީހުގެ ފުރަތަމަ ދައުރު ހިނގާނީ ފެބުރުވަރީ މަހުގެ ފުރަތަމަ ދުވަހުން ފެށިގެން މެއި މަހުގެ ފަނަރަ ވަނަ ދުވަހުގެ ނިޔަލަށެވެ. މަޖިލީހުގެ ދެވަނަ ދައުރު ޖޫން މަހުގެ ފުރަތަމަ ދުވަހުން ފެށިގެން އޮގަސްޓު މަހުގެ ފަނަރަވަނަ ދުވަހުގެ ނިޔަލަށް ހިނގާއިރު ތިންވަނަ ދައުރު ހިނގާނީ އޮކްޓޫބަރު މަހުގެ ފުރަތަމަ ދުވަހުން ފެށިގެން ނޮވެންބަރު މަހުގެ ނިޔަލަށެވެ.
މަޖިލިސް ގަވާއިދު ބަޔާންކޮށްފައިވާ ގޮތުގައި، މި ތިން ދައުރުގެ ތެރެއިން، ކޮންމެ ދައުރެއްގެ ވެސް ފުރަތަމަ ޖަލްސާ ބާއްވަންޖެހޭނީ، އެ ދައުރެއް ފެށޭ ތާރީހާ ވިދިގެން އަންނަ ފުރަތަމަ ހޯމަ ނުވަތަ ފުރަތަމަ ބުރާސްފަތި ދުވަހުއެވެ. އެ ދައުރު ނިމޭ ޖަލްސާ ބާއްވަންޖެހޭނީ އެ ދައުރުގެ ތެރޭގައި އަންނަ އެންމެފަހު ބުރާސްފަތި ދުވަހު ނުވަތަ ހޯމަ ދުވަހުއެވެ.
މަޖިލީހުގެ ގަވާއިދު މިގޮތަށް ކަނޑައަޅާފައި އޮތް ނަމަވެސް ދައުރު ދަންމާލުމުގެ ބާރު މަޖިލީހަށް ލިބިގެންވެއެވެ.
