މާލެ އާއި ހުޅުމާލެ ގުޅުވައިދޭ ހައިވޭގައި ރޭ ހިނގި ނުރައްކާތެރި އެކްސިޑެންޓެއްގައި ނިޔާވީ އިންޑިއާގެ ރައްޔިތެއްކަން ހާމަވެއްޖެއެވެ.
ފުލުހުން މައުލޫމާތު ދީފައިވާ ގޮތުގައި، މި ހާދިސާގައި ނިޔާވެފައިވަނީ އުމުރުން 50 އަހަރުގެ އިންޑިއާ ފިރިހެނެކެވެ. މި އެކްސިޑެންޓް ހިނގާފައިވަނީ ހުޅުމާލެއިން މާލެއަށް ދަތުރުކުރާ ފަޅީގެ، އެއާޕޯޓު ޓްރެފިކް ލައިޓް ކައިރީގައެވެ.
ފުލުހުން ބުނީ މި ހާދިސާގެ ރިޕޯޓު ލިބިފައިވަނީ ރޭ 22:12 އެހައިކަންހާއިރު ކަމަށެވެ. މި ހާދިސާ ހިނގަން މެދުވެރިވި ގޮތާ ބެހޭގޮތުން ފުލުހުން ބުނީ، އެކްސިޑެންޓް ހިނގީ ސައިކަލެއް ކަހާލައިގެން ވެއްޓުނު ވަގުތު، އެ ސަރަހައްދުން ދަތުރުކުރި ޕިކަޕެއްގެ ދަށުވުމުގެ ސަބަބުން ކަމަށެވެ.
މަންޒަރުދުށް ފަރާތްތަކުން ބުނީ އެމީހާ ޕިކަޕުގެ އަރިމަތިން އޯވަރޓޭކް ކުރަން އުޅުމުގެ ތެރޭގައި ސައިކަލެއްގައި ޖެހި ވިއްސައިންގޮސް ޕިކަޕު ދަށުވީކަމަށެވެ. އަދި އެވަގުތު އޭނާގެ ފުރާނަ ދިޔައީ ކަމަށްވެސް ލަފާކުރެވޭކަމަށް ބުނެއެވެ. ހާދިސާ ހިނގި ސަރަހައްދުގައި އޭނާގެ ސިކުނޑި އާއި ގޮހޮރުން ބައެއްވެސް ފެންނަން ހުރިކަމަށް މަންޒަރުދުށް ފަރާތްތަކުން ބުނެއެވެ.
މި މައްސަލަ އިތުރަށް ތަހުގީގު ކުރަމުންދާ ކަމަށްވެސް ފުލުހުން ބުންޏެވެ.
ފަހަކަށް އައިސް މާލެ ސަރަހައްދުގެ މަގުތަކާއި ހައިވޭގައި ނުރައްކާތެރި އެކްސިޑެންޓްތައް ހިނގާ މިންވަރު ވަނީ އިތުރުވެފައެވެ.
