ނޫސްވެރިކަމުގެ މިނިވަންކަން އިހު އޮތްގޮތަށް އިޔާދަކުރުމަށް ކަމަށް ވިދާޅުވެ، ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް އިދިކޮޅު އެމްޑީޕީއާ ގުޅުމުން، ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހިމް ޝުޖާއު، ޔާމީނަށް ވަރަށް ބޮޑަށް ފާޑުވިދާޅުވެއްޖެއެވެ.
ކޯޓު އަމުރަކާ ހިލާފުވުމުގެ ސަބަބުން ”އަދަދު“ ނޫހުގެ ދެ ނޫސްވެރިއަކު ހައްޔަރުކުރުމާ ގުޅިގެން ރައީސް ޔާމީން ވަނީ ނޫސްވެރިންގެ ހިމާޔަތުގައި އެމްޑީޕީއާއިއެކު ގުޅިގެން މަސައްކަތްކުރައްވަން ތައްޔާރަށް ހުންނެވި ކަމަށް ވިދާޅުވެފައެވެ. ރައީސް ޔާމީނުގެ ނިންމުމާ ގުޅިގެން މެންބަރު ޝުޖާއު މީސް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވީ، ނޫސްވެރިންގެ ހިމާޔަތުގައި ކަމަށް ވިދާޅުވެ ވާހަކަދައްކަވާތީ އެމަނިކުފާނަށް ނޫސްވެރިން މަލާމާތްކުރާ ކަމަށެވެ.
ނޫސްވެރިންގެ ހިމާޔަތުގައޭ މަނިކުފާނު ވިދާޅުވީމާ ނޫސްވެރިން މަނިކުފާނަށް އެބަ މަލާމާތް ކުރޭ!މަނިކުފާނުގެ ވެރިކަމުގައި ނޫސްވެރިން އުޅެންޖެހުނު ގޮތް އެކުދިންގެ ހަނދާނުން ނުފިލާކަމަށް ވިދާޅުވި.މަނިކުފާނު ތިހެން ވިދާޅުވުމުން ރާއްޖެ ޓީވީ ފަންޑު ފޮށި ބެހެއްޓި ނޫސްވެރިން މަނިޖުފާނަށް…
— Ibrahim Shujau (@IbrahimShujaau) May 13, 2026
ޝުޖާއު ވިދާޅުވީ، ރައީސް ޔާމީނުގެ ވެރިކަމުގައި ނޫސްވެރިން އުޅެންޖެހުނު ގޮތް ހަނދާން ނުނެތޭ ކަމަށާއި، އެމަނިކުފާނު އެ ފަދަ މޭރުމަކުން ވާހަކަދެއްކެވުމުން ރާއްޖެ ޓީވީ ފަންޑު ފޮށި ބެހެއްޓި ނޫސްވެރިން އެކަމަށް މަލާމަތްކުރާ ކަމަށެވެ.
”ނޫސްވެރިންގެ ހިމާޔަތުގައޭ މަނިކުފާނު ވިދާޅުވީމާ ނޫސްވެރިން މަނިކުފާނަށް އެބަ މަލާމާތްކުރޭ، މަނިކުފާނުގެ ވެރިކަމުގައި ނޫސްވެރިން އުޅެންޖެހުނު ގޮތް އެ ކުދިންގެ ހަނދާނުން ނުފިލާ ކަމަށް ވިދާޅުވި“ – ޝުޖާއު ވިދާޅުވިއެވެ.
ނޫސްވެރިންގެ ހިމާޔަތުގައި ނުުކުންނަވަން ތައްޔާރަށް ހުންނެވި ކަމަށް ރައީސް ޔާމީން ވިދާޅުވިއިރު، އެމަނިކުފާނުގެ ވެރިކަން ފާހަގަކުރެވިގެން ދިޔައީ ނޫސްވެރިންނަށް އަމާޒުކޮށް އެތައް ދަތިތަކެއް ކުރިމަތިކުރި ވެރިކަމެއްގެ ގޮތުގައެވެ. އެގޮތުން އަބުރުގެ ގާނޫނެއް ވުޖޫދުކޮށް އެތައް ނޫހަކާއި ވަކިވަކި ނޫސްވެރިން ބޮޑެތި އަދަދުތަކުން ޖޫރިމަނާކުރުމުގެ ސަބަބުން، ރާއްޖެ ޓީވީ ފަދަ ބައެއް ޓީވީ ޗެނަލްތަކާއި ނޫސްތަކުން ފަންޑު ފޮށި ބަހައްޓަން ވެސް މަޖުބޫރުވިއެވެ.
މީގެ އިތުރުން ރައީސް ޔާމީނަކީ ނޫސްވެރިންނާ އެންމެ ބީރަށްޓެހި ރައީސްގެ ގޮތުގައި މަޝްހޫރުވެފައިވާ ރައީސް ވެސް މެއެވެ. އެގޮތުން އެމަނިކުފާނުގެ ވެރިކަމުގައި ނޫސްވެރިންނާއެކު ބައްދަލުކުރެއްވުންތައް ބާއްވާފައިވަނީ ވެސް އަތުން ގުނާލެވޭހައި މަދު ފަހަރެއްގައެވެ.
