ބެއިރޫތު – ލުބުނާނުގައި އިޒްރޭލުން ހިންގަމުންދާ އިސްތިއުމާރީ އެޖެންޑާގެ ދަށުން ދެމުންދާ ޙަމަލާތައް ހުއްޓާލުމުގެ އެއްބަސްވުމެއް އޮތް ކަމަށް ޑިޕްލޮމެޓިކް ފެންވަރުގައި ބުނި ނަމަވެސް، މައިދާނުގައި ހިނގަމުންދާ ކަންކަމުން ފެންނަނީ މުޅިން ތަފާތު މަންޒަރެކެވެ. ބައިނަލްއަޤްވާމީ އިދާރާތަކުން ކަށަވަރުކޮށްފައިވާ އެންމެ ފަހުގެ ތަފާސްހިސާބުތަކުން ދައްކާގޮތުގައި، 2026 ވަނަ އަހަރުގެ މާރިޗު 2 ވަނަ ދުވަހު ފެށުނު ހަމަނުޖެހުންތަކުގައި އެންމެ ބޮޑު ގެއްލުމެއް ލިބެމުންދަނީ ކުޑަކުދިންނާއި އާންމު ރައްޔިތުންނަށެވެ.
ހަނގުރާމައިގެ ތަފާސްހިސާބުތައް:
މެއި 2026 ގެ ނިޔަލަށް ލިބިފައިވާ ރަސްމީ މަޢުލޫމާތުތަކުން ލުބުނާނުގެ ނާޒުކު ޙާލަތު ވަރަށް ސާފުކޮށް ހާމަވެއެވެ:
– ކުޑަކުދިންނަށް ލިބޭ ގެއްލުން: ޔުނިސެފްގެ ޑެޕިއުޓީ އެގްޒެކެޓިވް ޑިރެކްޓަރ ޓެޑް ޗައިބަން ވިދާޅުވި ގޮތުގައި، މާރިޗު މަހުގެ ކުރީކޮޅުން ފެށިގެން މިހާތަނަށް 111 ކުޑަކުދިން މަރުވެ، 334 ކުދިން ވަނީ ޒަޚަމްވެފައެވެ. މީގެ މާނައަކީ، އިޒްރޭލުގެ ޙަމަލާތަކުގައި ކޮންމެ ދުވަހަކު އެވްރެޖްކޮށް 4 ކުޑަކުދިން (މުޅި ކްލާސްރޫމެއްގެ ކުދިން) މަރުވެ ނުވަތަ ޒަޚަމްވަމުންދާ ކަމެވެ.
– އާންމުންގެ މަރުތައް: ލުބުނާނު ސަރުކާރުގެ ޑިޒާސްޓަރ ރިސްކް މެނޭޖްމަންޓް ޔުނިޓުން ހާމަކޮށްފައިވާ ގޮތުގައި، އިޒްރޭލުގެ އަސްކަރީ އޮޕަރޭޓްތަކުގައި މިހާތަނަށް ލުބުނާނުން މަރުވި މީހުންގެ ޖުމްލަ އަދަދު ވަނީ 2,883 އަށް އަރާފައެވެ. އަދި އިތުރު 8,787 މީހުން ވަނީ ޒަޚަމްވެފައެވެ
– ބިން ފޭރުން: އިޒްރޭލުން ދެމުންދާ ޙަމަލާތަކުގެ ސަބަބުން 1 މިލިއަނަށްވުރެ ގިނަ މީހުންގެ ގެދޮރުން ނިކުންނަން މަޖުބޫރުވެ މަގުމަތިވެފައިވާއިރު، އޭގެ ތެރޭގައި 350,000 ކުޑަކުދިން ހިމެނޭކަމަށް ޔުނިސެފުން ލަފާކުރެއެވެ
އަސްކަރީ އަމާޒުތަކާއި ބައިނަލްއަޤްވާމީ ޤާނޫނު:
”ފަޔަރ-ބެލްޓް“ ގެ ނަމުން ނަންދީފައިވާ އަސްކަރީ ސިޔާސަތުގެ ދަށުން ދެކުނު ލުބުނާނުގައި ބަރު ހަތިޔާރު ބޭނުންކޮށްގެން ދެމުންދާ ޙަމަލާތަކުގެ ސަބަބުން އާންމުން ދިރިއުޅޭ ސަރަޙައްދުތައް ވަނީ ބޮޑު ނުރައްކަލަކަށް ހުށަހެޅިފައެވެ. އިންސާނީ ޙައްޤުތަކަށް ވަކާލާތުކުރާ ފަރާތްތަކުން ފާހަގަކުރާ ގޮތުގައި، ޣައްޒާގައިވެސް އާންމުންނަށް އަމާޒުކޮށް ހިންގި ފަދަ ޢަމަލުތައް ލުބުނާނުގައިވެސް ދަނީ ތަކުރާރުވަމުންނެވެ. ހަނގުރާމަ ހުއްޓުވުމަށް ބައިނަލްއަޤްވާމީ މުޖުތަމަޢު ނުކުޅެދިފައިވުމަކީ، ބައިނަލްއަޤްވާމީ އިންސާނީ ޤާނޫނުތަކުގެ ބާރުވެރިކަމާމެދު ބޮޑެތި ސުވާލުތަކެއް އުފެދޭ ކަމެކެވެ.
