ސަރުކާރުގެ ސީނިއާ ޕޮލިޓިކަލް ޑިރެކްޓަރެއްގެ މަގާމުގައި ހުންނެވި އީޝާ އަޝްރަފް މަގާމުން ވަކިކުރުމާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ބަދަލު ހިފާނެ ކަމަށް ބުނާ އޯޑިއޯއެއް ސޯޝަލް މީޑިއާގައި މިއަދު ލީކުވެއްޖެއެވެ.
ސޯޝަލް މީޑިއާގެ ”ރާކަނި“ ނަމަކަށް ކިޔާ ޕޭޖުން އާންމުކޮށްފައިވާ މި އޯޑިއޯއަކީ އީޝާ އޭނާގެ ބައްޕައާ ފޯނުން ވާހަކަދައްކަމުން ދިޔަ ވަގުތުގެ ރެކޯޑިންގް އެއްކަމަށް ބުނެފައިވެއެވެ. މި އޯޑިއޯގައި އީޝާ ވަނީ އޭނާ މަގާމުން ވަކިކުރިކަން ރައީސް އޮފީހުން އަންގާފައިވާ ކަމަށާއި، އެކަމުގެ ބަދަލު ވަރަށް ހިތިކޮށް ހިފާނެ ކަމަށް ބުނެ ރައީސަށް އިންޒާރު ދީފައެވެ.
ލީކުވެފައިވާ އޯޑިއޯގައި އީޝާ އޭނާގެ ބައްޕައަށް ގުޅައި ބުނެފައިވަނީ، ރައީސް އޮފީހުން ގުޅާފައި މިއަދުން ފެށިގެން ސީނިއާ ޕޮލިޓިކަލް ޑިރެކްޓަރުގެ މަގާމުން ވަކިކުރިކަން އަންގާފައިވާ ކަމަށެވެ. އަދި ވަކިކުރި ކަމުގެ ލިޔުން ފޮނުވާނެ ކަމަށްވެސް ރައީސް އޮފީހުން ބުނެފައިވާ ކަމަށް އީޝާ ކިޔައިދީފައިވެއެވެ.
🚨 އީޝާ ރައީސް މުޢިއްޒުގެ އަބުރުކަތިލީ ވަޒީފާއިން ވަކިކުރީމަ ބަދަލުހިފަންކަން މި އޯޑިއޯއިން ސާބިތުވޭ pic.twitter.com/ypojbdvucy
— Raakani Mv (@RaakaniMV) May 13, 2026
އެހެންކަމުން އެކަމުގެ ބަދަލު ކޮންމެސް ދުވަހަކުން ހިފާނެ ކަމަށާއި، ރައީސް މުޢިއްޒު ހީނުކުރާވަރުގެ ހިތިކޮށް ބަދަލު ހިފާނެ ކަމަށްބުނެ މި އޯޑިއޯގައި ވާހަކަ ދައްކާފައިވެއެވެ.
މައުލޫމާތު ލިބޭގޮތުގައި އޭނާ ވަޒީފާއިން ވަކިކޮށްފައިވަނީ އޭނާ އޭރު ލޯބީގެ ގޮތުން ގުޅިގެން އުޅުނު ކުރީގެ ސްޓެލްކޯ އެމްޑީ ސަމާހުގެ ކޮރަޕްޝަން މައްސަލަތަކާއި ގުޅިގެން އޭނާ މަގާމުން ވަކިކުރުމާއެކު، އީޝާ އޮފީހަށް ހާޒިރުވުން ހުއްޓާލުމުންނެވެ. ރަސްމީ އެއްވެސް މަސައްކަތަކަށް ނުނިކުމެ ގިނަ ދުވަސްތަކެއް ވުމުން އޭނާ ސިޔާސީ މަޤަމުން ވަނީ ވަކިކޮށްފައެވެ.
މިއާއިއެކު އޭނާ ދަނީ އެކިގޮތްގޮތުން ރައީސް މުޢިއްޒުގެ އަބުރަށް އަރައިގަނެ، އެކި ކަހަލަ ތުހުމަތުކުރަމުންނެވެ. ލީކުވި އޯޑިއޯ އާއި ގުޅިގެން ގިނަބަޔަކު ދަނީ އީޝާ ހައްޔަރުކުރުމަށްވެސް ގޮވާލަމުންނެވެ.
