މާލޭ ސަރަޙައްދުން ހިމަބިހި (މީސަލްސް) އަށް ޕޮޒިޓިވްވެފައިވާ ދެ މީހަކު ފެނިއްޖެއެވެ. ހެލްތް ޕްރޮޓެކްޝަން އެޖެންސީ (އެޗްޕީއޭ) އިން މައުލޫމާތު ދެއްވި ގޮތުގައި، މި ކޭސްތައް ފެނިފައިވަނީ މި ހަފްތާގެ ތެރޭގައެވެ.
މި ކޭސްއާ ގުޅިގެން އާންމުކޮށް އަމަލުކުރާ އުސޫލުގެ މަތިން ”ބަލި ޖެހުނު ގޮތް ދެނެގަތުމަށް“ (ކޭސް އިންވެސްޓިގޭޝަން) ކުރަންޖެހޭ މަސައްކަތްތައް އެޗްޕީއޭއިން މިހާރު ވަނީ ފަށާފައެވެ. މީގެ އިތުރުން، ބަލި ޖެހުނު މީހާ އާ ކޮންޓެކްޓްވި މީހުން ދެނެގަތުމާއި، އެ މީހުންގެ ތެރެއިން ވެކްސިން ފުރިހަމަނުކުރާ ފަރާތްތަކަށް ވެކްސިން ދިނުމުގެ މަސައްކަތް މިހާރު ދަނީ ކުރެވެމުންނެވެ.
މިއަހަރުގެ މިހާތަނަށް ރާއްޖެއިން ހިމަބިހީގެ ޖުމްލަ 5 ކޭސް ރިޕޯޓްކޮށްފައިވާ ކަމަށް އެޗްޕީއޭގެ ތަފާސްހިސާބުތަކުން ދައްކައެވެ. މީގެ ތެރޭގައި ރާއްޖެއިން ބޭރުން ބަލި ޖެހިގެން އައި މީހުންވެސް ހިމެނެއެވެ. ދުނިޔޭގެ އެކި ކަންކޮޅުތަކުގައާއި ރާއްޖޭގެ އަވަށްޓެރި ގައުމުތަކުގައިވެސް މި ބަލި ފެތުރޭ މިންވަރު އިތުރުވަމުންދާ ދުވަސްވަރެއްގައި، ރާއްޖެއިންވެސް މި ބަލި ފެންނަމުންދާތީ ސިއްހީ އިދާރާތަކުން ވަނީ ސަމާލުވުމަށް އިލްތިމާސްކޮށްފައެވެ.
އެޗްޕީއޭއިން ބުނެފައިވަނީ ހިމަބިހީގެ އަލާމާތްތަކަށް އާންމުން ސަމާލުވުން މުހިއްމު ކަމަށެވެ. އެގޮތުން، ހުން އައުމާއެކު ހަށިގަނޑުން ރަތް ބިހިތަކެއް ފެންނަން ފަށައިފިނަމަ، ލަސްނުކޮށް ސިއްހީ ފަރުވާ ހޯދުމަށް އެ އެޖެންސީން ވަނީ އިރުޝާދު ދީފައެވެ.
ހިމަބިއްސަކީ ވައިގެ ޒަރީއާއިން ވަރަށް ފަސޭހައިން ފެތުރޭ ބައްޔަކަށް ވީއިރު، މި ބަލިން ރައްކާތެރިވުމަށް އޮތް އެންމެ މުހިއްމު ފިޔަވަޅަކީ ވެކްސިންގެ ދެ ޑޯޒް ފުރިހަމަކުރުމެވެ. ރާއްޖެއަކީ 2017 ވަނަ އަހަރު ހިމަބިހި ނައްތާލެވިފައިވާ ގައުމެއްގެ ގޮތުގައި ދުނިޔޭގެ ސިއްހަތު ޖަމިއްޔާ (ޑަބްލިއު.އެޗް.އޯ) އިން ކަނޑައަޅާފައިވާ ގައުމެކެވެ. ނަމަވެސް ބޭރު ގައުމުތަކުން ބަލި އެތެރެވުމުގެ ފުރުސަތު އޮތުމާއެކު، ދޭތެރެ ދޭތެރެއިން ރާއްޖެއިން މި ބަލީގެ ކޭސްތައް ދަނީ ފެންނަމުންނެވެ.
