ނޫސްވެރިކަމުގެ މިނިވަންކަން އިޔާދަކުރަން ކުރީގެ ރައީސް މުހައްމަދު ނަޝީދާއި އިބްރާހިމް މުހައްމަދު ސޯލިހާ އެކު މަސައްކަތްކުރައްވަން ތައްޔާރަށް ހުންނެވި ނޫސްވެރިންނަށް އެތަކެއް އަނިޔާތަކެއް ކުރި ކުރީގެ ރައީސް އަބްދުﷲ ޔާމީން އަބްދުލްގައްޔޫމް މިއަދު ވިދާޅުވެއްޖެއެވެ.
ކޯޓު އަމުރަކާ ހިލާފު ކަމަށް ބުނާ މައްސަލައެއްގައި އިއްޔެ ވަނީ ދެ ނޫސްވެރިން ޖަލަށްލާފައެވެ.
އެ މައްސަލައާ ގުޅިގެން އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް ވަނީ ކުރީގެ ތިން ރައީސުން ހިޔާލު ތަފާތުވުންތައް އެއްކިބާކޮށް، އެކުގައި ގައުމު ސަލާމަތްކުރަން ނުކުންނަވަން ގޮވާލައްވާފައެވެ.
އެއާއެކު ރައިސް ޔާމީން މިއަދު ވަނީ އެކަމަށް އިޖާބަދީ ތައްޔާރަށް ހުންނެވިކަމަށް ވިދާޅުވެފައެވެ.
ނޫސްވެރިންގެ ހައްގުގައި ނުުކުންނަވަން ތައްޔާރަށް ހުންނެވިކަމަށް ރައީސް ޔާމީން ވިދާޅުވިއިރު، އެ މަނިކުފާނުގެ ވެރިކަމުގައި ވަނީ ނޫސްވެރިންނަށް އެތައް ދަތިތަކެއް ކުރިމަތިކޮށްފައެވެ. އެގޮތުން އަނބުރުގެ ގާނޫނެއް ވުޖޫދުކޮށް އެތައް ނޫހަކާއި ވަކިވަކި ނޫސްވެރިން ބޮޑެތި އަދަދުތަކުން ޖޫރިމަނާކުރިއެވެ. އެ ސަބަބާހުރެ ބައެއް ނޫސްތަކުން ފަންޑު ފޮށި ބަހައްޓަންވެސް މަޖުބޫރުވިއެވެ.
ފާހަގަކޮށްލެވޭ ގޮތުގައި، ރައީސް ޔާމީނަކީ ރާއްޖޭގެ ތާރީހުގައިވެސް ނޫސްވެރިންނާ އެންމެ ބީރަށްޓެހި ރައީސެކެވެ. އެގޮތުން އެ މަނިކުފާނުގެ ދައުރުގައި ނޫސްވެރިންނާ ބައްދަލުކުރައްވާފައިވަނީވެސް މަދު ފަހަރެއްގައެވެ،
