މަސްތުވާތަކެތީގެ ބާވަތެއް ކަމަށްވާ ޑައިމޯފިން ޓްރެފިކްކުރުމުގެ ކުށް ސާބިތުވެ، ނ. ވެލިދޫއަށް ނިސްބަތްވާ ދެމީހަކު ދިގު މުއްދަތަކަށް ޖަލަށްލުމަށާއި ބޮޑު އަދަދަކުން ޖޫރިމަނާކުރުމަށް ކޯޓުން ހުކުމްކޮށްފިއެވެ.
މި މައްސަލައިގައި ކުށް ސާބިތުވެ ހުކުމް އިއްވާފައިވަނީ ނ. ވެލިދޫ، ދިލްބަހާރުގެ، އަޙްމަދު އިބްރާހީމް (44އ) އާއި އެ ރަށު ހެޕީގާރޑްން، ޙުސައިން އިބްރާހީމް (39އ) ގެ މައްޗަށެވެ.
އަޙްމަދު އިބްރާހީމްގެ މައްޗަށް މަސްތުވާތަކެއްޗާބެހޭ ގާނޫނުގެ ދަށުން ޑައިމޯފިން ޓްރެފިކްކުރުމުގެ ކުށާއި ކެނެބިސް ބޭނުންކުރުމުގެ ކުށް ވަނީ ސާބިތުވެފައެވެ. މި ދެކުށުގެ އުގޫބާތެއްގެ ގޮތުން އޭނާ 25 އަހަރަށް ޖަލަށްލުމާއެކު 100,000 (އެއްލައްކަ) ރުފިޔާއިން ޖޫރިމަނާކުރުމަށާއި، ކެނެބިސް ބޭނުންކުރި މައްސަލައިގައި އިތުރު 3 އަހަރުގެ ޖަލު ހުކުމެއް ވަނީ އިއްވާފައެވެ. ނަމަވެސް، ޖިނާއީ އިޖުރާއަތުގެ ގާނޫނަށް ރިއާޔަތްކޮށް އޭނާ ތަންފީޒުކުރަންޖެހޭ ޖަލު އަދަބެއްގެ ގޮތުގައި ކަނޑައަޅާފައިވަނީ 27 އަހަރާއި 11 މަހާއި 5 ދުވަހެވެ. އަޙްމަދު އިބްރާހީމް ހައްޔަރުކޮށްފައިވަނީ 2024 މެއި 7 ގައެވެ.
ޙުސައިން އިބްރާހީމްގެ މައްޗަށް ސާބިތުވެފައިވަނީ ޑައިމޯފިން ޓްރެފިކްކުރުމުގެ ކުށެވެ. އެ ކުށުގެ އުގޫބާތެއްގެ ގޮތުން އޭނާވެސް 25 އަހަރަށް ޖަލަށްލުމާއެކު 100,000 (އެއްލައްކަ) ރުފިޔާއިން ޖޫރިމަނާކުރުމަށް ވަނީ ހުކުމްކޮށްފައެވެ. އޭނާ ބަންދުގައި ހޭދަކުރީ މުއްދަތަށް އުނިކުރުމަށްފަހު، ތަންފީޒުކުރަންޖެހޭ ޖަލު އަދަބަކީ 24 އަހަރާއި 11 މަހާއި 14 ދުވަސް ކަމަށް ކޯޓުން ވަނީ ކަނޑައަޅާފައެވެ. ޙުސައިން އިބްރާހީމް ހައްޔަރުކޮށްފައިވަނީ 2022 އެޕްރީލް 11 ގައެވެ.
ކޯޓުން މި ދެމީހުންގެ މައްޗަށް ހުކުމް އިއްވާފައިވަނީ 2026 މެއި 12 ވަނަ ދުވަހުއެވެ.
މި މައްސަލަތަކަކީ މަސްތުވާތަކެއްޗާ ދެކޮޅަށް ފުލުހުން ކުރަމުންދާ މަސައްކަތުގެ ތެރެއިން، ކަމާ ގުޅުންހުރި މުއައްސަސާތަކާ ގުޅިގެން ހިންގި ތަހުގީގުތަކުގެ ނަތީޖާއެވެ. ދިވެހި ފުލުހުންގެ ޚިދުމަތުން ހާމަކޮށްފައިވާ ގޮތުގައި، މަސްތުވާތަކެތީގެ ވިޔަފާރިކުރާ ފަރާތްތަކާ މެދު ގާނޫނީ ގޮތުން އެޅެން އޮތް އެންމެ ހަރުކަށި ފިޔަވަޅު އެޅުމަށް ހާއްސަ މަސައްކަތްތަކެއް އެ މުއައްސަސާއިން ދަނީ ކުރަމުންނެވެ.
