އީރާނާއެކު ކުރަމުންދާ ހަނގުރާމަ ނިމުމަކަށް ގެނައުމަށް މަޝްވަރާކުރާއިރު، އެމެރިކާގެ ރައްޔިތުންނަށް ކުރިމަތިވެފައިވާ މާލީ ދަތިތަކަކީ އޭނާގެ ނިންމުންތައް ނިންމުމުގައި ބަލާ ކަމެއް ނޫން ކަމަށް އެމެރިކާގެ ރައީސް ޑޮނާލްޑު ޓުރަމްޕު އަންގާރަ ދުވަހު ބުނެފިއެވެ. އަދި އޭނާގެ އެންމެ އިސް އަމާޒަކީ އީރާނުން ނިއުކްލިއާ ހަތިޔާރު ހޯދުން ހުއްޓުވުން ކަމަށްވެސް ބުނެފައި ވެއެވެ.
އެއްބަސްވުމަކަށް އައުމަށް މަސައްކަތް ކުރާއިރު، އެމެރިކާގެ ރައްޔިތުންގެ މާލީ ހާލަތަށް ބައްލަވަނީ ކިހާ ވަރަކަށްތޯ ނޫސްވެރިއަކު ސުވާލުކުރުމުން ޓުރަމްޕު ބުނެފައިވަނީ ”ކުޑަކޮށްވެސް ނުބަލަން“ ކަމަށެވެ.
ޗައިނާއަށް ކުރައްވާ ދަތުރެއްގައި ވައިޓް ހައުސްއިން ފުރުމުގެ ކުރިން ޓުރަމްޕު ބުނީ، ”އީރާނާ ބެހޭގޮތުން ވާހަކަދައްކާއިރު އަހަރެން ސަމާލުކަންދޭ ހަމައެކަނި ކަމަކީ، އެމީހުންނަށް ނިއުކްލިއާ ހަތިޔާރު ނުލިބޭނެ ގޮތް ހެދުން“. ކަމަށެވެ. އިތުރަށް ޓުރަމްޕު ބުނެފައިވާ ގޮތުގައި، ”އަހަރެން އެމެރިކާގެ ރައްޔިތުންގެ މާލީ ހާލަތަކަށް ނުވިސްނަން. އަހަރެން އެއްވެސް މީހަކާ މެދު ނުވިސްނަން. އަހަރެން ވިސްނަނީ ހަމަ އެންމެ ކަމަކަށް: އީރާނަށް ނިއުކްލިއާ ހަތިޔާރު އުފެއްދުމުގެ ފުރުސަތު ދީގެން ނުވާނެ. އެއީ ހުރިހާވެސް ކަމަކީ. އަހަރެންނަށް ހިތްވަރު ލިބިދޭ ހަމައެކަނި ކަމަކީ އެއީ“ އެވެ.
