ވެރިކަން ކުރާ ޕާޓީ ޕީއެންސީގެ ޕާލަމެންޓްރީ ގުރޫޕްގެ ވަޓްސްއެޕް ގުރޫޕުން، ރައްޔިތުންގެ ނައިބު ރައީސް އަދި ދިއްގަރު ދާއިރާގެ މެންބަރު އަޙްމަދު ނާޒިމް ބޭރުކޮށްލައިފިއެވެ.
ޕީއެންސީގެ ޕާލަމެންޓްރީ ގުރޫޕްގެ ވަޓްސްއެޕް ގުރޫޕުން ނާޒިމް ބޭރުކޮށްލާފައިވާ ކަމަށް ބުނެ ދެކެވޭ ވާހަކަތަކަކީ ތެދެއްކަން އެ ޕާޓީގެ އިސްފަރާތަކުން ވަނީ މި ނޫހަށް ޔަގީންކޮށްދެއްވައިފައެވެ. ނަމަވެސް އެ ގުރޫޕުން ނާޒިމް ބޭރުކޮށްލީ ސީދާ ކޮން ސަބަބަކާ ހުރެ ކަމެއް އެ ބޭފުޅާ ވިދާޅުވެދެއްވައިފައެއް ނުވެއެވެ.
ޕީއެންސީގެ ޕާލަމެންޓްރީ ގުރޫޕްގެ ވަޓްސްއެޕް ގުރޫޕުން ނާޒިމް ބޭރުކޮށްލާފައިވާއިރު، އެ ގުރޫޕްގެ އެޑްމިންގެ ގޮތުގައި ހުންނަވާ ބޭފުޅަކީ ޕީއެންސީގެ ރައީސް އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.
ފާހަގަކޮށްލެވޭ ގޮތުގައި، މިފަހުން ރައްޔިތުންގެ މަޖިލީހުގެ އެންމެ ބާރުގަދަ ދެ ކޮމިޓީ ކަމަށްވާ ސަލާމަތީ ހިދުމަތްތަކުގެ ކޮމިޓީ (241 ކޮމިޓީ) އާއި މާލިއްޔަތު ކޮމިޓީން ނާޒިމް ވަކިކުރުމާއި ގުޅިގެން، އޭނާގެ އިތުބާރު ނެތް ކަމުގެ މައްސަލައެއް މަޖިލީހަށް ހުށަހަޅަން އުޅޭކަމުގެ އަޑުތަކެއް ވެސް ވަނީ ފެތުރިފައެވެ. އަދި، މަޖިލީހުގެ ނައިބު ރައީސްކަމުން ނާޒިމް ދުރުކުރުމަށް މެންބަރުންގެ ސޮއި ހަމަކުރުމުގެ މަސައްކަތްތަކެއް ވެސް ކުރަމުންދާކަމުގެ އަޑުތަކެއް ފެތުރިފައިވެއެވެ.
ނަމަވެސް މިކަމާ ގުޅިގެން ޕީއެންސީގެ ޕާލަމެންޓްރީ ގްރޫޕްގެ ލީޑަރު އިބްރާހީމް ފަލާޙު ވިދާޅުވީ، އެފަދަ އެއްވެސް ކަމެއް ނުހިނގާ ކަމަށެވެ.
