ރައީސް ޑރ. މުޙައްމަދު މުޢިއްޒުގެ ސަރުކާރުން މިހާތަނަށް 561 މިލިއަން ރުފިޔާ މަސްވެރިންނަށް ދޫކޮށްފައިވާ ކަމަށް ފިޝަރީޒް މިނިސްޓްރީން ބުނެފިއެވެ.
މަސްވެރިންނަށް ދޫކުރަމުން އަންނަ ފައިސާގެ ތެރެއިން މިދިޔަ މަހުގެ 14 ވަނަ ދުވަހުގެ ނިޔަލަށް ހުރި ބިލުތަކުގެ ފައިސާ އިއްޔެގެ ނިޔަލަށް ދައްކާ ނިންމާނެ ކަމަށް ބުނެ މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) އިން އެކްސްގައި ކުރި ޕޯސްޓަކާ ގުޅިގެން ފިޝަރީޒް މިނިސްޓްރީން ބުނީ ރައީސް ގެންދަވަނީ މަސްވެރިންނަށް ދޭން ޖެހި، ނުދެވިވާ ފައިސާ ދެއްކުމަށް ކަމާ ގުޅޭ އިދާރާތައް މެދުވެރިކޮށް ގިނަގުނަ މަސައްކަތްތަކެއް ކުރައްވަމުން ކަމަށެވެ.
އިއްޔެ މިފްކޯއިން ޖަމާކުރި 35 މިލިއަން ރުފިޔާ އާއެކު، ސަރުކާރުން މަސްވެރިންނަށް ވަޢުދުވެފައިވާ ގޮތުގެ މަތިން މިދިޔަ ބުދަ ދުވަހުން ފެށިގެން ހޯމަ ދުވަސް ހިމެނޭހެން ޖުމްލަ 105 މިލިއަން ރުފިޔާ މަސްވެރިންނަށް ޖަމާކޮށްދީފައިވާނެ ކަމަށް ފިޝަރީޒް މިނިސްޓްރީން ބުނެއެވެ. އެ މިނިސްޓްރީން ބުނެފައި ވަނީ އިއްޔެ ދޫކުރި 35 މިލިއަން ރުފިޔާ ހިމަނައިގެން، މިދިޔަ ނޮވެމްބަރު މަހުގެ 17 ވަނަ ދުވަހުން ފެށިގެން ޖުމްލަ 561 މިލިއަން ރުފިޔާ މަސްވެރިންނަށް ދޫކޮށްފައިވާ ކަމަށެވެ. މި ފައިސާގެ ތެރޭގައި ތެލަށާއި އައިހަށް ދޫކޮށްފައިވާ ފައިސާ ވެސް ހިމެނޭ ކަމަށް ފިޝަރީޒް މިނިސްޓްރީން ބުނެއެވެ.
ފިޝަރީޒް މިނިސްޓްރީން ބުނި ގޮތުގައި ބެކްލޮގްގައި ހުރި ފައިސާ މަސްވެރިންނަށް ދެވޭނެ އިންތިޒާމް ހަމަޖެއްސުމަށް މަސައްކަތް ކުރަމުން އަންނަ ކަމުގައެވެ.
މަސްވެރިންނަށް ނުދެވި ހުރި ފައިސާ އަންނަ މަހުގެ ފަސްވަނަ ދުވަހުގެ ނިޔަލަށް ސަރުކާރުން ދައްކާ ނިންމާނެ ކަމަށް ފިޝަރީޒް މިނިސްޓަރު އަޙުމަދު ޝިޔާމް މީގެ ކުރިން ވަނީ ވިދާޅުވެފައެވެ. މިނިސްޓަރު ވިދާޅުވެފައި ވަނީ ކުރިމަތިވެފައިވާ މާލީ ގޮންޖެހުންތަކާ އެކު ވެސް، ރޯދަ މަހުގެ ކުރިން މަސްވެރިންނަށް ދޭން ޖެހޭ ފައިސާ ދީ ނިންމާނެ ކަަމަށެވެ.
