ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަކީ މީޑިއާއާއި ޑިމޮކްރަސީއާ ބީރައްޓެހި ބޭފުޅެއްގެ ގޮތުގައި ސިފަކުރުމަށް ބައެއް ފަރާތްތަކުން ކުރާ މަސައްކަތަކީ، ރައްޔިތުންނަށް އޮޅުވާލުމަށް ހިންގާ ހީލަތްތެރި ފިތުނަވެރި އަމަލެއް ކަމަށް ފިޝަރީޒް މިނިސްޓަރު އަދި ޕީއެންސީގެ ނައިބު ރައީސް އަޙްމަދު ޝިޔާމް ވިދާޅުވެއްޖެއެވެ.
މިކަމާ ގުޅޭގޮތުން ޝިޔާމް ވިދާޅުވީ، ވާދަވެރި ސިޔާސީ ޕާޓީތަކުންނާއި މި ސަރުކާރާ ދެކޮޅު ބައެއް މީޑިއާތަކުން ރައީސް މުޢިއްޒުގެ އަބުރުފުޅު ކޭލުމަށް މަސައްކަތް ކުރި ނަމަވެސް، އެމަނިކުފާނަކީ ނޫސްވެރިންނާ ވަރަށް ގާތުން މަސައްކަތްޕުޅު ކުރައްވާ ބޭފުޅެއް ކަމަށެވެ. އެގޮތުން، ކޮންމެ ހަފްތާއަކު އެއްދުވަހު ނޫސްވެރިންނާ ބައްދަލުކުރައްވައި، ދައުލަތުގެ ކަންކަމާ ގުޅޭ މަޢުލޫމާތުތައް ރައްޔިތުންނަށް ފޯރުކޮށްދެއްވުމުގައި ރައީސް ނަމޫނާ ދައްކަވަމުންދާކަން ޝިޔާމް ފާހަގަކުރެއްވިއެވެ.
”މިނިވަން ނޫސްވެރިކަމަށް ދޭންޖެހޭ ފުރިހަމަ ޖާގަ މި ސަރުކާރުން އެބަދޭ. އެކަމަކު ނޫސްވެރިކަމުގެ ނަމުގައި މީހުންގެ އަބުރު ނަގާލައި، ޝަރުޢީ ކޯޓުތަކުން ކުރާ އަމުރުތަކަށް ގޮންޖެހުމަކީ ޑިމޮކްރަސީއެއް ނޫން،“ ޝިޔާމް ވިދާޅުވިއެވެ.
ޝިޔާމް އިތުރަށް ވިދާޅުވީ، ރައީސުލްޖުމްހޫރިއްޔާގެ އޮފީހަކީ ޤާނޫނުގެ ވެރިކަން ނަގަހައްޓާ ތަނެއް ކަމަށާއި، ކޯޓު އަމުރުތަކަށް ގޮންޖަހައި އަމަލުކުރުމުގެ ފުރުސަތު އެ އޮފީހުގައި އެމަނިކުފާނު ނުދެއްވާނެ ކަމަށެވެ. އަދި ދާދިފަހުން ”އަދަދު“ ނޫހުގެ ނޫސްވެރިޔާގެ ފަރާތުން ފެނިގެންދިޔައީ ނޫސްވެރިކަމުގެ އަޚްލާޤީ ހަމަތަކާ ޚިލާފު، ދަށުދަރަޖައިގެ އަމަލެއް ކަމަށްވެސް އޭނާ ސިފަކުރެއްވިއެވެ.
ބައެއް ނޫސްވެރިން، ރައީސުލްޖުމްހޫރިއްޔާ ބާއްވަވާ ނޫސްވެރިންގެ ބައްދަލުވުންތަކަކީ އެއްވެސް ޙަޤީޤަތެއް ނެތް ކަންކަމުގެ މައްޗަށް ބިނާކޮށް ޒާތީގޮތުން ފުރައްސާރަކުރަން ލިބޭ ފުރުސަތެއްގެ ގޮތުގައި ދެކޭކަމީ ހިތާމަހުރި ކަމެއް ކަމަށް ޝިޔާމް ވިދާޅުވިއެވެ. މިފަދަ ޒިންމާދާރުކަން ކުޑަ އަމަލުތަކުގެ ސަބަބުން، ހަމަާއި އުސޫލުގެ މަތިން މަސައްކަތްކުރާ ޒިންމާދާރު ނޫސްވެރިންގެ މަސައްކަތަށްވެސް ހުރަސް އެޅޭކަން އޭނާ ފާހަގަކުރެއްވިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަކީ މީޑިއާ އާއި ޑިމޮކްރަސީއާ ބީރައްޓެހި ބޭފުޅެއްގެ ގޮތުގައި ސިފަކުރަން ވާދަވެރި ސިޔާސީ ޕާޓީތަކުންނާއި މި ސަރުކާރާ ކަނޑައެޅިގެން ދެކޮޅުކަމަށް ބުނެފައިވާ ބައެއް މީޑިއާތަކުން ކުރާ މަސައްކަތަކީ ރައްޔިތުންނަށް…
— Ahmed Shiyam (@Shiyamaldives) May 12, 2026
މިނިސްޓަރު ޝިޔާމްގެ ވާހަކަ ނިންމާލައްވަމުން ވިދާޅުވީ، ރައީސް ޑރ. މުޙައްމަދު މުޢިއްޒުގެ ސަރުކާރުން އަބަދުވެސް ޒިންމާދާރު ނޫސްވެރިކަމަށް މަރުޙަބާ ކިޔާނެ ކަމަށެވެ. އަދި ރައީސް މުޢިއްޒަކީ ޤާނޫނުގެ ވެރިކަން ނެގެހެއްޓުމުގައި ސާބިތުވެ ހުންނަވާނެ، ރައްޔިތުންނަށް އިޚްލާޞްތެރި ވެރިއެއްކަމުގެ ޔަޤީންކަން އޭނާ އެރުވިއެވެ.
