”އަދަދު“ ނޫހުން ދައުރުކޮށްފައިވާ ޑޮކިއުމެންޓްރީއާ ގުޅޭ އެއްވެސް ވާހަކައެއް އެއްވެސް ފަރާތަކުން ނުދެއްކުމަށް ކްރިމިނަލް ކޯޓުން ނެރެފައިވާ އަމުރާ ހިލާފުވުމުން، ރައީސް އޮފީހުގެ ނޫސްވެރިންގެ ބައްދަލުވުންތަކަށް އެ ނޫހުގެ ނޫސްވެރިން ވަނުން ވަގުތީ ގޮތުން މަނާކޮށްފިއެވެ.
”އަދަދު“ ނޫހުން ދައުރުކޮށްފައިވާ ޑޮކިއުމެންޓްރީއާ ގުޅޭ އެއްވެސް ވާހަކައެއް އެއްވެސް ފަރާތަކުން ނުދެއްކުމަށް އަންގާ ކްރިމިނަލް ކޯޓުން ވަނީ އިއްޔެ އަމުރެއް ނެރެފައެވެ. އެ ކޯޓުން މި އަމުރު ނެރެފައިވަނީ، ”އަދަދު“ ގެ ސީއީއޯ ޙުސައިން ފިޔާޒް މޫސާ އާއި އެ ނޫހުގެ އެޑިޓަރު ޙަސަން މުޙައްމަދުގެ މައްޗަށް ޤަޛުފުގެ ދައުވާ އުފުލާފައިވާތީ، ދައުލަތުން އެފަދަ އަމުރަކަށް އެދުމާ ގުޅިގެންނެވެ.
މިކަމާ ގުޅިގެން ރައީސް އޮފީހުން މީޑިއާތަކަށް މިރޭ ފޮނުވި މެސެޖެއްގައި ބުނެފައިވަނީ، ”އަދަދު“ ނޫހުގެ މީސް މީޑިއާ އެކައުންޓަކުން ދައުރުކޮށްފައިވާ ވީޑިއޯ ކޮންޓެންޓަކާ ގުޅޭ ޖިނާއީ މައްސަލައެއް ކްރިމިނަލް ކޯޓުގައި ހިންގަމުންދާ ކަމަށް ދިވެހި ފުލުހުންގެ ހިދުމަތުން އެ އޮފީހަށް މައުލޫމާތު ދީފައިވާ ކަމަށެވެ.
މި މައްސަލަ މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަން ކޮމިޝަނުން ވެސް ބަލަމުންދާ ކަމަށް މައުލޫމާތު ދީފައިވާތީއާއި މިއަދު ހެނދުނު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބޭއްވެވި ނޫސްވެރިންގެ ބައްދަލުވުމުގައި ކޯޓު އަމުރާ ހިލާފަށް ”އަދަދު“ ނޫހުގެ ނޫސްވެރިޔާ މުޙައްމަދު ޝަހުޒާން އަމަލުކޮށްފައިވާ ކަމަށް ރައީސް އޮފީހުގެ މެސެޖުގައި ވަނީ ބުނެފައެވެ.
ރައީސް އޮފީހުން ބުނީ، އެ އޮފީހުން ބާއްވާ ނޫސްވެރިންގެ ބައްދަލުވުންތަކަށް ހާޒިރުވުމާއި އެ ބައްދަލުވުންތައް ކަވަރުކުރުމުގައި އަމަލުކުރާނެ ގޮތުގެ އުސޫލުގެ އިތުރުން ރައީސްގެ އޮފީހަށް ލިބިދޭ އިހުތިޔާރުގެ ދަށުން އެ މައްސަލަތައް ހިނގަމުންދާ މުއްދަތުގެ ތެރޭގައި ރައީސް އޮފީހުން އިންތިޒާމުކޮށް ބާއްވާ އެއްވެސް ނޫސްވެރިންގެ ބައްދަލުވުމަކަށް ”އަދަދު“ ނޫހާއި އެ ނޫސް ތަމްސީލުކުރާ އެއްވެސް ނޫސްވެރިއަކު މިއަދުން ފެށިގެން ނުވައްދަން ނިންމާފައިވާ ކަމަށެވެ.
