ލުބުނާނުގައި ވަކިވަކި ފަރުދުން ހޯދައި މަރާލުމަށް އިޒްރޭލު އަސްކަރިއްޔާއިން އޭއައި ޓާގެޓިން ސިސްޓަމެއް ބޭނުންކުރަމުންދާ ކަމަށް ކަމަށް ’ލޮސް އެންޖެލިސް ޓައިމްސް‘ އިން ރިޕޯޓްކޮށްފިއެވެ. މި ސިސްޓަމަކީ ހަނގުރާމަވެރިންނާއި އާންމު ރައްޔިތުން ޔަގީންކަމާއިއެކު ވަކިކުރަން ނޭނގޭ ސިސްޓަމެއް ކަމަށް ތަޖުރިބާކާރުން ވަނީ ފާހަގަކޮށްފައެވެ.
މި ސިސްޓަމަކީ ފޯނުގެ މެޓަޑޭޓާއާ، ފޭޝަލް ރިކޮގްނިޝަން ޓެކްނޮލޮޖީއާ، ޑްރޯން ސާވޭލަންސްއާ، ސިމް ކާޑު ޓްރެކިން އަދި ސޯޝަލް މީޑިއާ ފަދަ ވަސީލަތްތަކުން މައުލޫމާތު އެއްކުރާ ސިސްޓަމެކެވެ. އަދި މި މައުލޫމާތުތައް ޕްރޮސެސް ކުރަނީ ޕަލަންޓިއާގެ ’މޭވަން‘ ހިމެނޭހެން ތަފާތު ޕްލެޓްފޯމްތައް މެދުވެރިކޮށެވެ.
ތަޖުރިބާކާރުން ފާހަގަކޮށްފައިވާ ގޮތުގައި ހަނގުރާމަވެރިއެއްކަމުގެ ސީދާ ހެއްކަށް ބެލުމުގެ ބަދަލުގައި، އުޅުމާއި ގުޅުންތައް ހުންނަ ގޮތުގެ މައްޗަށް ބިނާކޮށް ނުރައްކަލެއް އޮތްކަމަށް މި ސިސްޓަމުން ދެނެގަތުމުގެ ސަބަބުން ހަނގުރާމަވެރިންނާ އެއްގޮތް މުއާމަލާތްތަކެއް ހުންނަ މީހުންވެސް މި ސިސްޓަމުން ނުރައްކާތެރި ބައެއްގެ ގޮތުގައި ފާހަކުރެވެއެވެ.
އަދި މީގެ އިތުރުން ހަމައެކަނި ފެންނަން ހުރި މައުލޫމާތުތަކެއް އެކަތި އަނެކައްޗާ އަޅާކިޔައި ޕެޓާންތަކެއް ހޯދާ ސިސްޓަމަކަށް ވުމުން އެޔަށް ލިބޭ މައުލޫމާތުގައި ކުށެއް އުޅޭނަމަ، އިންސާނަކު އެ ނަތީޖާއާ މެދު ސުވާލު އުފެއްދުމެއް ނެތި، ފުރާނައަށް ނުރައްކާވާ ފަދަ ބޮޑެތި ގޯސްތައް މެދުނުކެނޑި މި ސިސްޓަމުން ތަކުރާރު ކުރަމުންދާނެއެވެ.
ފާހަގަކޮށްލެވޭ ގޮތުގައި އިޒްރޭލުން ވަނީ ޣައްޒާގައި ދެމުންގެންދާ ހަމަލާތަކުގައިވެސް ޕަލަންޓިއާގެ މިފަދަ ޓެކްނޮލޮޖީތައް ބޭނުންކޮށްފައެވެ.
