ތިލަދުންމަތީ ދެކުނުބުރީ ނައިވާދޫ ކައުންސިލުން ރަށު ތަރައްޤީއަށް ބޭނުންވާ ކަންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އާ ހިއްސާކުރައްވައިފިއެވެ.
ރައީސް، ނައިވާދޫ ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުންނާ ބައްދަލުކުރައްވާފައި ވަނީ ހޯމަ ދުވަހުގެ ރޭ ހދ. ނެއްލައިދޫ ސްކޫލުގައެވެ.
މި ބައްދަލުކުރެއްވުމުގައި ކައުންސިލުން ވަނީ މިހާރު ފަށާފައި ހުރި މަޝްރޫޢުތައް ކުރިއަށްދާލެއް ލަސްވުމުގެ ސަބަބުން ކަންބޮޑުވުން ފާޅުކުރައްވާފައެވެ. އަދި ރަށުގައި ޞިއްޙީ ދާއިރާ އާއި ކުޅިވަރުގެ ދާއިރާ އިތުރަށް ތަރައްޤީ ކުރުމަށް ބޭނުންވާ ކަމުގައި ކައުންސިލުގެ ފަރާތުން ފާހަގަކުރެއްވިއެވެ. މީގެ އިތުރުން މިސްކިތަކާއި ޕޮލިސް ޕޯސްޓެއް ގާއިމުކުރުމަށް ބޭނުންވާ ކަމަށާ އަދި ފަތުރުވެރިކަމުގެ ދާއިރާ ކުރިއެރުވުމަށް ބޭނުންވާ ކަމުގައި ކައުންސިލުން ހާމަކުރިއެވެ. ހަމައެއާއެކު ކަރަންޓު އުފެއްދުމުގައި އިއާދަކުރަނިވި ހަކަތައަށް ބަދަލުވުމަށް ކައުންސިލުން އިސްނަގައިގެން ކުރާ މަސައްކަތްތައް ފާހަގަކޮށް، ސަރުކާރުން، ކައުންސިލަށް އެކަން ކުރުމަށް ބާރު ދެއްވުމަށް ރައީސްގެ އަރިހުން އެދިވަޑައިގެންނެވިއެވެ.
މި ބައްދަލުކުރެއްވުމުގައި ނައިވާދޫގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީން ވަނީ، ކޮމިޓީގެ މަސައްކަތްތަކަށް އޮފީސް ޖާގައިގެ ބޭނުންތެރިކަމާއި ބަޖެޓުގެ ދަތިކަން ފާހަގަކުރައްވާފައެވެ.
މި ބައްދަލުކުރެއްވުމުގައި ރައީސް ދެއްކެވި ވާހަކަފުޅުގައި، ކައުންސިލުން ފާހަގަކުރެއްވި ކަންކަން އޮތްގޮތް ބައްލަވައި، އެ ކަންކަން ހައްލު ކުރުމަށް މަސައްކަތް ކޮށްދެއްވާނެ ކަމުގައި ވިދާޅުވިއެވެ. މި ބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން ވަނީ ކައުންސިލުން ފާހަގަކުރެއްވި ކަންކަމުގައި ސަރުކާރުން ކުރައްވަމުން ގެންދަވާ މަސައްކަތްތަކުގެ އެންމެފަހުގެ މަޢުލޫމާތު ހިއްސާކުރައްވާފައެވެ.
