އެޓެންޝަން-ޑެފިސިޓް ހައިޕަރއެކްޓިވިޓީ ޑިސްއޯޑަރ ނުވަތަ އޭޑީއެޗްޑީ (ADHD) ހުންނަ ކުދިންނަށް ބޭނުންވާ މުހިއްމު ބޭހެއް ރާއްޖެ އެތެރެކުރުމުގެ ހުއްދަ ދިނުމަށް ރައްޔިތުންގެ މަޖިލީހުން މިއަދު ރުހުން ދީފިއެވެ.
މަޖިލީހުން މިގޮތަށް ރުހުން ދީފައިވަނީ މަސްތުވާތަކެއްޗާބެހޭ ޤާނޫނުގެ ޖަދުވަލު 1 އަށް އިސްލާހު ގެންނެވުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވާފައިވާ މައްސަލަ ދިރާސާކުރުމަށްފަހުއެވެ. މި މައްސަލަ މަޖިލީހުގައި ދިރާސާކޮށްފައިވަނީ ސަލާމަތީ ޚިދުމަތްތަކާބެހޭ ކޮމިޓީ (241 ކޮމިޓީ) އިންނެވެ.
އޭޑީއެޗްޑީ ހުންނަ ކުދިންނަށް ބޭނުންވާ ބޭހެއްކަމަށްވާ ”މެތަލްފެނެޑޭޓް“ ރާއްޖެއަށް އެތެރެކުރުމާ ގުޅޭގޮތުން ނޭޝަނަލް ޑްރަގް ކޮންޓްރޯލް ކައުންސިލުން ދެއްވާފައިވާ ލަފަޔާމެދު ވަޒީރުންގެ މަޖިލީހުގައި ވަނީ މީގެކުރިން މަޝްވަރާކުރައްވާފައެވެ. ރާއްޖެއަށް އެތެރެކުރުން މަނާ ބޭހުގެ ތެރޭގައި މިހާތަނަށް ހިމެނެމުންދިޔަ މި ބޭސް، މަސްތުވާތަކެއްޗާ ބެހޭ ޤާނޫނުގައި ހިމެނޭ މަނާތަކެތީގެ ލިސްޓުން އުނިކުރުމަށްޓަކައި ޤާނޫނަށް އިސްލާޙު ގެނައުމަށް ވަޒީރުންގެ މަޖިލީހުން ވަނީ ނިންމަވާފައެވެ.
ރައީސުލްޖުމްހޫރިއްޔާ ހުށަހެޅުއްވި މި މައްސަލަ ދިރާސާކުރުމަށްފަހު، ސަލާމަތީ ޚިދުމަތްތަކާ ބެހޭ ކޮމިޓީގެ މެންބަރުންގެ އިއްތިފާގުން ވަނީ އެ ބޭހަށް ހުއްދަ ދިނުމަށް ފާސްކޮށްފައެވެ. މިއާއެކު، މަޖިލީހުގެ ތަޅުމަށް ކޮމިޓީ ރިޕޯޓު ހުށަހެޅުމުން، ރާއްޖެއަށް އެތެރެކުރުން މަނާ ބޭހުގެ ލިސްޓުން އެ ބޭސް އުނިކޮށް، އެތެރެކުރުމުގެ ހުއްދަ ދޭން ފެންނަކަމަށް ފާސްކޮށްފައިވަނީ ޖަލްސާގައި ބައިވެރިވެވަޑައިގެންނެވި ހުރިހާ މެންބަރުންގެ އިއްތިފާގުންނެވެ. މި ޖަލްސާގެ ރިޔާސަތު ބެލެހެއްޓެވީ މަޖިލީހުގެ ރައީސް ޢަބްދުއްރަޙީމް ޢަބްދުﷲ އެވެ.
މެތަލްފެނެޑޭޓަކީ އޭޑީއެޗްޑީ ހުންނަ ކުދިންނަށް ދޭ ”ފަސްޓްލައިން ޓްރީޓްމަންޓް“ ނުވަތަ އެންމެ ފުރަތަމަ މަރުހަލާގެ ފަރުވާގައި ބޭނުންކުރާ އެންމެ މުހިއްމު އެއް ބޭހެވެ. އޭޑީއެޗްޑީއަކީ ކުޑަކުދިންގެ މެދުގައި ފާހަގަކުރެވޭ ހެދިބޮޑުވުމުގެ އެންމެ އާންމު އެއް ޙާލަތެވެ. މިފަދަ ބޭސްތަކާއި އެކި ތެރަޕީތަކުގެ އެހީގައި، އޭޑީއެޗްޑީގެ ސަބަބުން ކުރިމަތިވާ އުނދަގޫތަކާއި އަލާމާތްތައް ވަރަށް ބޮޑަށް ކުޑަކުރެވޭކަމަށް ސިއްހީ ދާއިރާގެ ދިރާސާތަކުން ދައްކައެވެ.
ކަމާބެހޭ އިދާރާތަކުން ހާމަކުރާ ގޮތުގައި، މި ބޭސް ރާއްޖެއަށް އެތެރެކުރަން ހުއްދަ ދިނުމަކީ އޭޑީއެޗްޑީ ހުންނަ ކުދިންނާއި އެކުދިންގެ އާއިލާތަކަށް ލިބިގެންދާނެ ވަރަށް ބޮޑު ލުޔެކެވެ.
