މެއި 6 ވަނަ ދުވަހު ޚާން ޔޫނިސްގެ ދެކުނުގައި ދިން ކުއްލި ހަމަލާއެއްގައި، އިޒްރޭލަށް ވާގިވެރިވާ ޙުސާމް އަލް-އަސްތާލްގެ މިލީޝާގެ 3 އެޖެންޓުން މަރާލާފައިވާ ކަމަށް ޣައްޒާގައި އިޒްރޭލުގެ އެޖެންޓުންނާއި ކުރިމަތިލުމަށް ޚާއްޞަ ސެކިއުރިޓީ ގޮފި ރާދިޢު ފޯހުން ޝާއިޢުކޮށްފައިވާ ވީޑިއޯއެއްގައި ބުނެފިއެވެ.
އަލް-އަސްތާލް އަކީ ވެސްޓު ބޭންކުގައި ވެރިކަންކުރާ އިޒްރޭލުގެ ގޮނޑިކޮއްކޮ ސަރުކާރު ”ފަލަޞްޠީނު އޮތޯރިޓީ“ ގެ ސަލާމަތީ ބާރުގެ ކުރީގެ އޮފިސަރެކެވެ. އޭނާއަކީ 1990 ގެ އަހަރުތަކުން ފެށިގެން އިޒްރޭލުގެ އިންޓެލިޖެންސާ ގުޅުން އޮންނަ ކަމަށް ތުހުމަތު ކުރެވޭ، އަދި 2018 ވަނަ އަހަރު މެލޭޝިއާގައި ފަލަޞްޠީނުގެ ސައިންސްވެރިޔާ ފާޟީ އަލްބަތުޝް މަރާލުމުގައި އިސްކޮށް އުޅުނު ކަމުގެ ތުހުމަތު ކުރެވޭ މީހެކެވެ.
2022 ވަނަ އަހަރު ގައްޒާގައި އޭނާގެ މައްޗަށް މަރުގެ ހުކުމް އިއްވާފައިވަނިކޮށް، އޭނާ ބަންދުކޮށްފައި ހުރި ތަނަށް އިޒްރޭލުން ދިން ހަމަލާތަކަކާ ގުޅިގެން އޭނާ ވަނީ މިނިވަންވެފައެވެ. އަދި 2025 ވަނަ އަހަރު އޭނާ އަލުން އާއްމުވެފައިވަނީ އަމިއްލަ ހަތިޔާރުއެޅި ޖަމާޢަތެއްގެ ލީޑަރެއްގެ ގޮތުގައެވެ. ދިރާސާކުރާ ފަރާތަކުން ސިފަކުރާ ގޮތުގައި، މިއީ ޣައްޒާގައި ހަރަކާތްތެރިވާ އިޒްރޭލަށް ވާގިވެރިވާ މިލީޝާތަކުގެ ތެރެއިން އެންމެ ނުރައްކާތެރި ޖަމާޢަތެވެ.
