ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލައަށް ދާއިމީ ހައްލެއް ހޯދުމަށް ވޭތުވެދިޔަ ސަރުކާރުތަކުގައި ނުކުރާ މިންވަރަށް މި ސަރުކާރުގައި މަސައްކަތްތަކެއް ކޮށް، އެކަމުގައި ކުރިއެރުންތަކެއް ހޯދައިފި ކަމަށް ހޯމް މިނިސްޓަރު ޢަލީ އިޙްސާން ވިދާޅުވެއްޖެއެވެ.
މިނިސްޓަރު އިޙްސާން މި މޭރުމުން ވިދާޅުވީ މީސް މީޑިއާގައި ހިއްސާކުރެއްވި ޕޯސްޓެއްގައެވެ. މިނިސްޓަރު ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގަތް ދުވަހުން ފެށިގެން، ގަވާއިދާ ހިލާފަށް ރާއްޖޭގައި އުޅޭ ބިދޭސީންގެ މައްސަލަ ހައްލުކުރުމަކީ ގައުމީ ވާޖިބެއްގެ ގޮތުގައި ކަނޑައަޅުއްވައި، އެ މަސައްކަތް ހޯމް މިނިސްޓްރީއާ ހަވާލުކުރައްވާފައިވާ ކަމަށެވެ.
ގަވާއިދާ ހިލާފަށް އުޅޭ ބިދޭސީންގެ މައްސަލައަށް ހައްލެއް ހޯދުމަށް މި ސަރުކާރުން ފަށާފައިވާ ”އޮޕަރޭޝަން ކުރަނގި“ އާއި ގުޅޭގޮތުން މިނިސްޓަރު އިޙްސާން ވިދާޅުވީ، ފާއިތުވި ދެ އަހަރު ދުވަހުގެ ތެރޭގައި ހޯމް މިނިސްޓްރީންނާއި ކަމާބެހޭ މުއައްސަސާތަކުން މި މައްސަލަ ހައްލުކުރުމަށް ނުހަނު ބުރަ މަސައްކަތްތަކެއް ކޮށްފައިވާ ކަމަށެވެ. މިނިސްޓަރު އިޙްސާން ވަނީ ކުރީގެ ސަރުކާރުތަކަށް ހައްލުނުކުރެވި އޮތް މި މައްސަލައަށް މި ސަރުކާރުގެ ފުރަތަމަ ދެ އަހަރުގެ ތެރޭގައި ހޯދިފައިވާ ކުރިއެރުންތަކަށްޓަކައި ރައީސް މުޢިއްޒަށް މަރުހަބާ ދަންނަވައިފައެވެ.
މީގެ އިތުރުން، މިނިސްޓަރު އިޙްސާން ވަނީ މި އޮޕަރޭޝަން ހިންގުމުގައި ހޯމް މިނިސްޓްރީއަށް އެއްބާރުލުންދީ، މިކަމުގައި އެހީތެރިވެދޭ ފަރާތްތަކާއި މުއައްސަސާތަކަށް ޝުކުރު އަދާކުރައްވައިފައެވެ.
