މިއަދު ފާހަގަކުރަމުންދާ ކުޑަކުދިންގެ ދުވަހުގެ އުފާވެރި މުނާސަބަތުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަނބިކަނބަލުން ސާޖިދާ މުޙައްމަދު، ރާއްޖޭގެ ހުރިހާ ކުޑަކުދިންނަށާއި އެކުދިންގެ ޢާއިލާތަކަށް ދުވަހުގެ ހެޔޮއެދުމާއި ތަހުނިޔާ ފޮނުއްވައިފިއެވެ.
ފަސްޓްލޭޑީ ސާޖިދާ މުޙައްމަދު މި ތަހުނިޔާ ފޮނުއްވާފައިވަނީ މިއަދު އެކަމަނާގެ ސޯޝަލް މީޑިއާ އެކައުންޓްތައް މެދުވެރިކުރައްވައި ކުރެއްވި ޕޯސްޓެއްގައެވެ.
ހެޔޮލަފާ ދަރީންތަކެއް ހެދި ބޮޑުވަމުންދާ ޤައުމެއްގެ މުސްތަޤްބަލާމެދު މާޔޫސްކަމެއް ނެތް. ކުޑަކުދީންނަށް އަޅަައިލާ، އޯގާތެރިކަމާއެކު ޙިމާޔަތް ދެމުން ދާހައި ހިނދަކު ކުރިމަގަށް ކުރާ އުންމީދު ދާނީ ހަގީގަތަކަށް ވަމުން.
ދިވެހި ލޮބުވެތި ކުޑަކުދިންނަށާއި ޢާއިލާތަކަށް މި އުފާވެރި ދުވަހުގެ… pic.twitter.com/jRVBaD4Lxi
— First Lady Sajidha Mohamed (@sajidhaamohamed) May 10, 2026
އެކަމަނާގެ މެސެޖުގައި ޤައުމުގެ ކުރިމަގު ބިނާވެފައިވަނީ ކުޑަކުދިންގެ މައްޗަށްކަން ފާހަގަކުރައްވަމުން ވިދާޅުވީ، ހެޔޮލަފާ ދަރީންތަކެއް ހެދި ބޮޑުވަމުންދާ ޤައުމެއްގެ މުސްތަޤްބަލާމެދު މާޔޫސްކަމެއް ނެތް ކަމަށެވެ.
މީގެއިތުރުން، ކުޑަކުދީންނަށް އަޅަައިލާ، އޯގާތެރިކަމާއެކު އެކުދިންނަށް ބޭނުންވާ ޙިމާޔަތް ދެމުން ދާހައި ހިނދަކު، ޤައުމުގެ ކުރިމަގަށް ކުރާ އުންމީދުތައް ދާނީ ހަގީގަތަކަށް ވަމުން ކަމުގައިވެސް ފަސްޓްލޭޑީ ވިދާޅުވިއެވެ.
ކުޑަކުދިންގެ ދުވަހާ ގުޅިގެން ރައީސުލްޖުމްހޫރިއްޔާގެ އަނބިކަނބަލުން މިފަދަ މެސެޖެއް ދެއްވާފައިވާއިރު، ސަރުކާރުން ދަނީ ކުޑަކުދިންގެ ޙައްޤުތައް ރައްކާތެރިކުރުމަށާއި، އެކުދިންނަށް އަމާން މުޖުތަމަޢެއް ބިނާކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ކުޑަކުދިންގެ ތަރުބިއްޔަތަށާއި ތަޢުލީމަށް ޚާއްޞަ އިސްކަމެއް ދެއްވާކަން ފާހަގަކުރެވެއެވެ.
މިއަދުގެ މި އުފާވެރި މުނާސަބަތުގައި ރާއްޖޭގެ އެކި ކަންކޮޅުތަކުގައި ކުޑަކުދިންނަށް ޚާއްޞަ ތަފާތު ހަރަކާތްތައް ދަނީ ހިންގަމުންނެވެ.
