މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) ސަރވިސް ކޯގެ، ސްކޫލް އޮފް އިންޖިނިއަރިންގ އެންޑް ލޮޖިސްޓިކްސް ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ ޑރ. މުޙައްމަދު މުޢިއްޒު ރަސްމީކޮށް ހުޅުއްވައިދެއްވައިފިއެވެ.
އެމަނިކުފާނު މި ސްކޫލް ހުޅުއްވައިދެއްވީ ދިވެހި ސިފައިންގެ 134 ވަނަ އަހަރީ ދުވަހުގެ މުނާސަބަތުގައި ރޭ ބޭއްވި ރަސްމީ ޖަލްސާގައެވެ. މި ސްކޫލް ހުޅުވުމާ ގުޅިގެން ޑިފެންސް މިނިސްޓްރީން ބުނެފައިވަނީ މި ސްކޫލަކީ ދިވެހި ސިފައިންގެ ފަންނީ ހުނަރާއި އިލްމީ ގާބިލުކަން މިހާރަށްވުރެ ބޮޑަށް ކުރިއެރުވުމަށް އެޅުނު މުހިންމު ފިޔަވަޅެއް ކަމަށެވެ.
ބ. ކިހާދޫގައި ގާއިމުކޮށްފައިވާ މި ސްކޫލުގެ އެންމެ މުހިންމު އެއް މަސައްކަތަކީ މޯލްޑިވްސް ނެޝަނަލް ސަރވިސް ނުވަތަ ދިވެހި ވަތަނީ ހިދުމަތުގެ ފަންނީ ތަމްރީނުތައް ކުރިއަށްގެންދިއުމެވެ. ޑިފެންސް މިނިސްޓްރީން މައުލޫމާތުދޭ ގޮތުގައި، މި ވަގުތު އެކަނި ވެސް ވަތަނީ ހިދުމަތުގެ ތަމްރީނު ފުރިހަމަކުރަމުންދާ 65 ދަރިވަރުން އެބަތިއްބެވެ. އެއީ 16 އަހަރާއި 19 އަހަރާ ދެމެދުގެ 49 ފިރިހެން ކުދިންނާއި 16 އަންހެން ކުދިންނެވެ.
މި ސްކޫލުން އުނގަންނައިދޭ ދާއިރާތަކުގެ ތެރޭގައި އޮޓޯމޮބައިލް އިންޖިނިއަރިންގ، މެރިން އިންޖިނިއަރިން، އިލެކްޓްރީޝަން، ރެފްރިޖެރޭޝަން، ވެލްޑިންގ އަދި އޮފީސް މެނޭޖްމަންޓް ފަދަ ދާއިރާތައް ހިމެނެއެވެ. މި ތަމްރީނުތަކަކީ މޯލްޑިވްސް ކޮލިފިކޭޝަން އޮތޯރިޓީ (އެމްކިޔުއޭ) ގެ އެޕްރޫވަލްއާއިއެކު ހިންގާ ލެވެލް ތިނެއްގެ ފެންވަރުގެ ތަމްރީނުތަކެކެވެ. ހަތަރު މަސްދުވަހުގެ މުއްދަތަކަށް ކުރިއަށްގެންދާ މި ތަމްރީނުތަކަކީ ދަރިވަރުން ވަޒީފާގެ މައިދާނަށް ނެރުމަށް ތައްޔާރުކޮށްދޭ ތަމްރީނުތަކެކެވެ.
މީގެ އިތުރުން، މި ސްކޫލުގައި ދަރިވަރުންގެ އަހްލާގާއި، ވަގުތަށް ބޯލެނބުމާއި، ދީނީ ހޭލުންތެރިކަން އިތުރުކުރުމުގެ ހާއްސަ ޕްރޮގްރާމުތަކެއް ވެސް ހިންގާނެއެވެ.
