ރާއްޖޭގައި ދިރިއުޅޭ ބިދޭސީ މަސައްކަތްތެރިންގެ ތެރެއިން 98 އިންސައްތަ މީހުންގެ ބަޔޯމެޓްރިކްސް ތަފްސީލު މިހާތަނަށް ނަގައި ނިމިފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެކްސްގައި ހިއްސާކުރެއްވި ޕޯސްޓެއްގައި ރައީސް މުޢިއްޒު ވިދާޅުވީ، ސައްހަކަން ކަށަވަރު ކުރެވިފައިވާ އެކްޓިވް ވޯކްޕަރމިޓުގައި މި ވަގުތު ރާއްޖޭގައި ގާއިމުވެތިބެގެން މަސައްކަތް ކުރަމުންދާ ބިދޭސީ މަސައްކަތްތެރިންގެ ތެރެއިން 98 އިންސައްތަ މީހުން ބަޔޯމެޓްރިކަލީ ކާކުކަން ދެނެގަނެވޭނެ ގޮތަށް، 10 އިނގިލީގެ ނިޝާނާއި ސާފު ފޮޓޯ ނަގާ ނިމިފައިވާ ކަމަށެވެ.
ސައްޙަކަން ކަށަވަރު ކުރެވިފައިވާ އެކްޓިވް ވޯކްޕަރމިޓުގައި މިވަގުތު ރާއްޖޭގައި ޤާއިމުވެތިބެގެން މަސައްކަތް ކުރަމުންދާ ބިދޭސީ މަސައްކަތްތެރިންގެ ތެރެއިން 98 އިންސައްތަ މީހުން ބަޔޯމެޓްރިކަލީ ކާކުކަން ދެނެގަނެވޭނެ ގޮތަށް 10 އިނގިލީގެ ނިޝާނާއި ސާފު ފޮޓޯ ވަނީ ނަގާ ނިމިފައި. (މި އަދަދު…
— Dr Mohamed Muizzu (@MMuizzu) May 9, 2026
ރައީސް މުޢިއްޒު ވެރިކަމާ ހަވާލުވެވަޑައިގަތްއިރު ބަޔޯމެޓްރިކްސް ފުރިހަމަކުރެވިފައިވަނީ އެންމެ 13 އިންސައްތަ ބިދޭސީންގެއެވެ. ނަމަވެސް، ވޭތުވެދިޔަ ދެ އަހަރުދުވަހުގެ ތެރޭގައި ކަމާ ގުޅުންހުރި އިދާރާތަކުން ކޮށްފައިވާ ހަރުދަނާ މަސައްކަތްތަކުގެ ސަބަބުން މި އަދަދު މިވަނީ 98 އިންސައްތައަށް އުފުލިފައެވެ.
ސަރުކާރުން މިހާރު އަމާޒު ހިފާފައިވަނީ ގަވާއިދާ ހިލާފަށް ދިވެހިރާއްޖޭގައި އުޅޭ ބިދޭސީންގެ މައްސަލައަށް ދާއިމީ ހައްލެއް ހޯދުމަށެވެ. މި މަސައްކަތުގެ ދަށުން ކުރިއަށް އޮތް ހަ މަސްދުވަހު ބަޔޯމެޓްރިކްސް ފުރިހަމަނުކުރާ ބިދޭސީން ހޯދައި، އެ މީހުން ޑީޕޯޓުކުރުމުގެ މަސައްކަތް ފަށާނެ ކަމަށް ރައީސް ވަނީ ވިދާޅުވެފައެވެ.
ބިދޭސީންގެ މައްސަލައަށް ދާއިމީ ހައްލެއް ހޯދުމަށް ކުރަމުން އަންނަ މަސައްކަތުގެ ތެރެއިން، ރާއްޖޭގައި މަސައްކަތްކުރާ ހުރިހާ ބިދޭސީންނަކީ ގާނޫނީ އިމުގެ ތެރެއިން އުޅޭ ބަޔަކަށް ހެދުމަކީ މި ސަރުކާރުން އަބަދުވެސް ގެންގުޅޭ ސިޔާސަތެކެވެ.
