ދިވެހި ޙައްޖުވެރިންނަށް މިނާގައި މި އަހަރު ލިބޭ ހިދުމަތްތައް، އޭގެ ކުރީ އަހަރަށްވުރެ ބޮޑުތަނުން ރަނގަޅުވާނެ ކަމަށް މޯލްޑިވްސް ޙައްޖު މިޝަންއިން ބުނެފިއެވެ.
މޯލްޑިވްސް ޙައްޖު މިޝަންއިން މި މޭރުމުން ބުނެފައިވަނީ މިނާގެ އެންމެފަހުގެ އިންތިޒާމުތައް ކުރިއަށްދާގޮތާ ގުޅޭގޮތުން މައުލޫމާތު ހިއްސާކުރަމުންނެވެ. މިކަމާ ގުޅޭ އެންމެފަހުގެ މައުލޫމާތު ހިއްސާކުރަމުން ޙައްޖު މިޝަންއިން ބުނެފައިވަނީ މި އަހަރު ވެސް ދިވެހި ޙައްޖުވެރިން މިނާގައި ތިބޭނީ އޭގެ ކުރީ އަހަރު ވެސް މިނާގައި ތިބި ސަރަހައްދުގައި ކަމަށެވެ.
މިނާގެ އެންމެހައި އިންތިޒާމުތަކެއް ކުރިއަށްގެންދަނީ މައްކާ އެޖެންޓް ރަވާފް މިނާގެ އެހީތެރިކަމާ އެކުގައެވެ. ރަވާފް މިނާއާއި ބައްދަލުކޮށް މިނާގައި ދިވެހިން ތިބުމަށް ހަމަޖެހިފައިވާ ސަރަހައްދުގެ މަސައްކަތްތައް ކުރިއަށްދާ ގޮތް ބެލުމަށްފަހު ޙައްޖު މިޝަންއިން ބުނެފައިވަނީ، މިނާގައި ކުރަންޖެހޭ މަސައްކަތްތަކުގެ ތެރެއިން މިހާރު ކުރިއަށްދަނީ ބޭނުންވާ ބައެއްކަހަލަ ވަސީލަތްތައް ޓެންޓަށް ގެންދިއުމުގެ މަސައްކަތް ކަމަށެވެ.
އެހެން އަހަރުތަކާ ހިލާފަށް މި އަހަރު އެންމެ ބޮޑު ބަދަލެއް ގެންނަނީ ފާހާނާތަކާއި ކެއިންބުއިމުގެ އިންތިޒާމްތައް ހަމަޖެއްސުމަށެވެ. އެގޮތުން މީގެ ކުރިން މިނާގައި ދިވެހި ޙަައްޖުވެރިން ބޭނުންކުރަމުންއައީ 20 ފާހާނާ ނަމަވެސް މި އަހަރު އެ އަދަދު ވަނީ 60 އަށް އިތުރުކޮށްފައެވެ. އަލަށް އިމާރަތްކުރެވުނު ފާހާނާ ބަރިއަކީ ބޭނުންކުރަން ފަސޭހަ، އަންހެނުންނާއި ފިރިހެނުންނަށް ވަކިން ބޭނުންކުރެވޭ ގޮތަށް ދެ ބަޔަކަށް އިމާރަތްކުރެވިފައިވާ ފާހަނާ ބަރިއެކެވެ.
ޙައްޖުވެރިންގެ ކެއިންބުއިމުގެ އިންތިޒާމްތަކަށް ބަލައިލާއިރު، މި އަހަރު މިނާގައި ކެއްކުމުގެ އިންތިޒާމް ކުރިއަށްވުރެ ރަނގަޅަށް ހަމަޖެއްސުމުގެ ގޮތުން ކައްކާ ބަދިގޭގެ ޖާގަ އިތުރުކޮށް ފެސިލިޓީތައް ވެސް ވަނީ އިތުރުކޮށްފައެވެ. އެ މަސައްކަތް ނިމި، މިހާރު ކުރިއަށްދަނީ ކެއްކުމަށް ބޭނުންވާ ބާވަތްތައް ޓެންޓަށް ގެންދިއުމުގެ މަސައްކަތެވެ.
ފާހަގަކޮށްލެވޭ ގޮތުގައި މި ސަރުކާރުން އަންނަނީ ސަޢުދީ ސަރުކާރާއި ގުޅިގެން ދިވެހި ޙައްޖުވެރިންނަށް ލުއި ފަސޭހަކޮށްދިނުމުގެ ގޮތުން ހިދުމަތްތައް ފުޅާކުރަމުގެ މަސައްކަތް ކުރަމުންނެވެ.
