މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުމަށް މި ސަރުކާރުން ވިލިމާލޭގައި ތަރައްގީކުރާ ތިން ޓަވަރުގެ ތެރެއިން އެއް ޓަވަރު ވިލިމާލެ ސްޓެލްކޯ ސައިޓް ސަރަހައްދުގައި ތަަރައްގީކުރުމަށް ހައުސިންގ މިނިސްޓްރީން ނިންމައިފިއެވެ.
ވިލިމާލޭގައި ތަރައްގީކުރާ ތިން ޓަވަރުގެ ތެރެއިން އެއް ޓަވަރު އެހެން ސަރަހައްދަކަށް ބަދަލުކުރަން ހައުސިންގ މިނިސްޓްރީން ނިންމާފައި މިވަނީ، މީގެ ކުރިން މި ޓަވަރުތައް ތަރައްގީކުރާ ސަރަހައްދުގައި ހުރި ފުނަގަސްތައް ކަނޑަންޖެހޭތީ، އެކަން އެގޮތަށް ނުކުރުމަށް ގޮވާލައި ތިމާވެށި ހިމާޔަތްކުރުމަށް މަސައްކަތްކުރާ ޖަމުއިއްޔާތަކާއި އާންމު ރައްޔިތުން ކަންބޮޑުވުން ފާޅުކުރުމާ ގުޅިގެންނެވެ.
މިކަމާ ގުޅިގެން ހައުސިންގ މިނިސްޓްރީން މީގެ ކުރިން ބުނެފަިއވަނީ، މި މަޝްރޫއު ކުރިއަށް ގެންދިއުމުގައި ސަރުކާރުން އަބަދުވެސް ބަލާފައިވަނީ، ބޮޑެތި ގަސްތައް ނުކަނޑައި މަޝްރޫއުގެ މަސައްކަތް ކުރިއަށް ގެންދިއުމަށް ކަމަށެވެ. އަލަށް ގެނެވުނު ބަދަލުތަކާއިއެކު، މި މަޝްރޫއުގެ ދަށުން ތަރައްގީކުރާ ތިން ޓަވަރުގެ ތެރެއިން ދެ ޓަވަރެއް ތަރައްގީ ކުރުމަށް ނިންމާފައިވަނީ ވިލިމާލޭ މުހްޔިއްދީން ސްކޫލް ކުރިމަތީގައި އޮންނަ ފުނަވަލުގެ އެއްފަރާތުގައެވެ. ތިންވަނަ ޓަވަރު ތަރައްގީ ކުރުމަށް ހަމަޖެހިފައިވަނީ ސްޓެލްކޯ ސައިޓް ހުންނަ ސަރަހައްދުގައެވެ.
ވިލިމާލޭގައި ތަރައްގީކުރާ 17 ފަންގިފިލާގެ ތިން ޓަވަރުގައި ޖުމުލަ 300 ހައުސިން ޔުނިޓް ހިމެނެއެވެ. ސަރުކާރުން މި މަސައްކަތް ހަވާލުކޮށްފައިވަނީ، ރަޝީދު ކާޕެންޓަރީ އެންޑް ކޮންސްޓްރަކްޝަން ޕްރައިވެޓް ލިމިޓެޑާއެވެ. މިއީ ވިލިމާލޭގައި އިތުރުވަމުންދާ އާބާދީއަށް ވަރަށް މުހިންމު މަޝްރޫއެއް ކަމަށް ސަރުކާރުން ދެކެއެވެ.
މި ޓަވަރުތަކުގެ މަސައްކަތް 2028 ވަނަ އަހަރުގެ މެދުތެރޭގައި އެއްކޮށް ނިންމާލެވޭނެ ކަމަށް ސަރުކާރުން ވަނީ ބުނެފައެވެ.
