މޫސުމާ ބެހޭ ގައުމީ އިދާރާ (މެޓް އޮފީސް) އިން މިއަދު ހާމަކުރި ގޮތުގައި، ރާއްޖޭގެ އިރުދެކުނުން ކޮޅިގަނޑެއް އުފެދިފައިވާތީ ކުރިއަށް އޮތް ދުވަސްތަކުގައި ރާއްޖޭގެ ބޮޑު ސަރަހައްދަކަށް މޫސުން ގޯސްވެ ވިއްސާރަ ކުރާނެ ކަމަށް ލަފާކުރެވެއެވެ.
މެޓް އޮފީހުން ނެރުނު މޫސުމީ ސަމާލުގައި ބުނެފައިވަނީ، ރާއްޖޭގެ އިރުދެކުނުން އުފެދިފައިވާ މި ކޮޅިގަނޑާ ގުޅިގެން ރާއްޖޭގެ ދެކުނުގެ ސަރަހައްދުތަކުގައި ވައި ގަދަވަމުންދާ ކަމަށެވެ. މީގެ އިތުރުން ރާއްޖޭގެ އިރުއުތުރުން އުފެދިފައިވާ ލޯޕްރެޝަރު ޓްރަޕެއްގެ ސަބަބުން އެ ސަރަހައްދުގައި ގިނަ އަދަދަކަށް ބޯ ވިއްސާރަވިލާ އުފެދެމުންދާ ކަމަށް ވެސް އެ އިދާރާއިން ފާހަގަކުރިއެވެ.
މި ބަދަލުތަކާއެކު ރާއްޖޭގެ ސަރަހައްދުގައި ހުޅަނގު މޫސުން ފެށިގެން ދިއުމުގެ ފުރުސަތު ބޮޑު ކަމަށް މެޓް އޮފީހުން ލަފާކުރެއެވެ. އެގޮތުން، މޭ 9 އިން 13 އަށް ހާއްސަކޮށް ދެކުނާއި މެދުރާއްޖެތެރޭގެ ސަރަހައްދުތަކުގައި ވައި ގަދަވެ، ބޯކޮށް ވާރޭވެހޭނެ ކަމަށް ވަނީ ލަފާކޮށްފައެވެ.
މޫސުން ގޯސްވެ، ކަނޑުތައް ގަދަވާނެތީ، ހުރިހާ ފަރާތްތަކުން، ހާއްސަކޮށް ކަނޑު ދަތުރުކުރާ ފަރާތްތަކުން މޫސުމަށް ވަރަށް ބޮޑަށް ސަމާލުވުމަށް މެޓް އޮފީހުން ވަނީ އިލްތިމާސްކޮށްފައެވެ. އަދި ދަތުރަށް ފުރުމުގެ ކުރިން މޫސުމާ ބެހޭ އެންމެ ފަހުގެ މައުލޫމާތު ހޯދުމަށާއި، ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް އެޅުމަށް ވެސް ވަނީ ނަސޭހަތްތެރިވެފައެވެ.
Weather advisory: Strong winds and rough seas are expected over the country. pic.twitter.com/TNjjnCpMj2
— Maldives Meteorology (@MetMaldives) May 8, 2026
ރާއްޖެއަށް މިހާރު ކުރަމުންދާ ވިއްސާރައިގައި ބައެއް ސަރަހައްދުތަކަށް މެޓް އޮފީހުން ދަނީ މޫސުމީ ސަމާލުތައް ނެރެމުންނެވެ. އެގޮތުން އެންމެ ފަހުން ވެސް ރާއްޖޭގެ އެންމެ ދެކުނުގެ އަތޮޅުތަކަށް ވަނީ ދަންވަރު 01:00 އާ ހަމައަށް ހުދު ސަމާލު ނެރެފައެވެ.
