ދުނިޔޭގެ ފުޓްސަލް ރޭންކިންގައި ރާއްޖެއިން ބޮޑު ކުރިއެރުމެއް ހޯދައި، ޔޫރަޕުގެ ބައެއް ބޮޑެތި ގައުމުތަކަށް ވުރެ ކުރިއަށް ޖެހިލައިފިއެވެ. ދުނިޔޭގެ ފުޓްސަލްގެ އެންމެ ފަހުގެ ރޭންކިން މިއަދު އާންމުކޮށްފައިވާއިރު، ރާއްޖެ މިވަނީ ފުރަތަމަ ފަހަރަށް ދުނިޔޭގެ ގަދަ 100 ގައުމުގެ ތެރޭގައި ހިމެނިފައެވެ.
ޖުމްލަ 143 ގައުމެއް ހިމަނައިގެން އާންމުކޮށްފައިވާ މި ރޭންކިންގައި ރާއްޖެ 99 ވަނައިގައި އޮތީ 914.49 ޕޮއިންޓާއެކުގައެވެ. މިއީ ރާއްޖޭގެ ފުޓްސަލް ތާރީޚުގައި މިހާތަނަށް ލިބުނު އެންމެ ބޮޑު ކުރިއެރުމެވެ.
ރާއްޖެއިން މި ހޯދި ކުރިއެރުމާއެކު، ޔޫރަޕުގެ ފާހަގަކޮށްލެވޭ ގިނަ ގައުމުތަކެއް ވަނީ ރާއްޖެއަށްވުރެ ފަހަތަށް ގޮސްފައެވެ. އެގޮތުން ތުރުކީ 109 ވަނައިގައި (872.07 ޕޮއިންޓް) އޮތްއިރު، ގްރީސް އޮތީ 112 ވަނައިގައެވެ. މީގެ އިތުރުން އެސްޓޯނިއާ (113 ވަނަ)، ނޮދަން އަޔަލޭންޑް (117 ވަނަ)، ސްވިޒަލޭންޑް (120 ވަނަ)، ޖިބްރޯލްޓާ (127 ވަނަ) އަދި ސަން މަރީނޯ (131 ވަނަ) ވެސް އޮތީ ރާއްޖެއަށްވުރެ މާ ފަހަތުގައެވެ.
ސަރަޙައްދީ ގައުމުތަކަށް ބަލާއިރުވެސް ރާއްޖެ އޮތީ ބޮޑު ތަފާތަކުން ކުރީގައެވެ. ނޭޕާލް 110 ވަނައިގައި އޮތްއިރު، އިންޑިއާ އޮތީ 130 ވަނައިގައެވެ. އަދި ޕާކިސްތާން، ބަންގްލަދޭޝް އަދި ސްރީލަންކާ އޮތީ ރޭންކިންގެ އެންމެ ފުލުގައެވެ.
ފާހަގަކޮށްލެވޭ އަނެއް ކަމަކީ ދުނިޔޭގެ ފުޓްބޯޅައިގެ ގަދަ ބާރެއް ކަމަށްވާ އިންގްލޭންޑާ ރާއްޖެއާ ދެމެދު އޮތް ކުޑަ ފަރަގެވެ. އިންގްލޭންޑް 97 ވަނައިގައި އޮތްއިރު، ރާއްޖެއާ އެ ގައުމާ ދެމެދު އޮތީ އެންމެ 3.26 ޕޮއިންޓުގެ ފަރަގެކެވެ. އަދި 98 ވަނައިގައި އޮތް އިސްރާއީލާ ރާއްޖެއާ ދެމެދު އޮތީ އެންމެ ޕޮއިންޓެއްގެ ފަރަގެކެވެ.
ރާއްޖޭގެ ރޭންކިންއަށް މި ބޮޑު ކުރިއެރުމެއް އައީ ދާދިފަހުން ނިމިގެންދިޔަ 2024 ވަނަ އަހަރުގެ ސާފް ފުޓްސަލް ޗެމްޕިއަންޝިޕްގެ ތަށި ރާއްޖެއިން ކާމިޔާބު ކުރުމާ ގުޅިގެންނެވެ. މި މުބާރާތުގައި ރާއްޖޭގެ ޓީމުން ވަނީ ކުޅުނު ހަ މެޗުންވެސް މޮޅުވެ، ބަލިނުވެ މުބާރާތް ނިންމާލައިފައެވެ.
ކުރިން ރޭންކިންގެ 100 އިން ބޭރުގައި އޮތް ރާއްޖެ، މިހާރު 99 ވަނައަށް ޖެހިލުމަކީ ކުޅިވަރުގެ ވަސީލަތްތައް މަދު ކުޑަ ޖަޒީރާ ގައުމަކަށް ލިބުނު ވަރަށް ބޮޑު ޝަރަފެކެވެ. މިއީ ދިވެހި ކުޅުންތެރިންގެ އަޚްލާޤާއި، ބުރަ މަސައްކަތާއި، އެއް ފެންވަރެއްގައި ހިފަހައްޓަމުންދާ ކުޅުމުގެ ފޮނި ނަތީޖާއެވެ.
