ރިޔާޟް / ކުވައިތު ސިޓީ – އެމެރިކާގެ އަސްކަރިއްޔާއިން ސަޢޫދީ ޢަރަބިއްޔާއާއި ކުވައިތުގެ ވައިގެ ސަރަޙައްދާއި އަސްކަރީ މަރުކަޒުތައް ބޭނުންކުރުމަށް އަޅާފައިވާ ފިޔަވަޅުތައް އެ ދެ ޤައުމުން ކުއްލި ގޮތަކަށް އުވާލައިފިއެވެ. މިއާއެކު، ހޮރްމޫޒް ކަނޑުއޮޅީގައި ހުޅަނގުގެ ވިޔަފާރި ބޯޓުފަހަރު ޙިމާޔަތްކުރުމަށް އެމެރިކާއިން ފަށާފައިވާ ”ޕްރޮޖެކްޓް ފްރީޑަމް“ އަލުން ފެށުމަށް މިވަނީ މަގުފަހިވެފައެވެ. މިއީ ގަލްފުގެ ޤައުމުތަކުގެ ސިޔާދަތީ ބާރުވެރިކަމުގެ ނިކަމެތިކަން ހާމަވެގެންދިޔަ ކަމެކެވެ.
އިސްލާމީ އުއްމަތަށްވުރެ ހުޅަނގުގެ މަސްލަޙަތު އިސްކުރުން
މި ދެ ޤައުމުން ކުރިން މި ފިޔަވަޅު އެޅީ، އެމެރިކާގެ އަސްކަރީ އޮޕަރޭޝަންތަކުގެ ސަބަބުން އީރާނުގެ ރައްދު ޙަމަލާތައް އަރަބި ޤައުމުތަކުގެ ތެޔޮ މަރުކަޒުތަކަށް އަމާޒުވެދާނެކަމުގެ ބިރު އޮތުމުންނެވެ. ފުޖައިރާއަށް ދާދިފަހުން ދިން ޙަމަލާއިން މި ބިރުވެރިކަން ވަނީ ސާބިތުވެސް ވެފައެވެ.
ނަމަވެސް ކުއްލި ގޮތަކަށް މި ފިޔަވަޅުތައް އުވާލުމުން މަޝްރަޙު ދިރާސާކުރާ ފަރާތްތަކުން ދެކޭގޮތުގައި މިކަމުން ހާމަވަނީ ޢަރަބި ލީޑަރުން އެމެރިކާޔާއި ހުޅަނގުގެ ޤައުމުތަކަށް ބަރޯސާވާ މިންވަރެވެ. އަމިއްލަ ޤައުމުގެ ސިޔާދަތާއި ސަލާމަތް ނުރައްކަލަށް ވެއްޓުނަސް ހެޔޮކަމަށް ޢަރަބި ލީޑަރުން އެމެރިކާއާއި ހުޅަނގުގެ އިޤްތިޞާދީ މަސްލަޙަތުތައް ޙިމާޔަތްކޮށްދިނުމަށް ފޫގަޅާފައިވާ މިންވަރެވެ. އަދި ޢަރަބި ޤައުމުތަކުގެ ވައިގެ ސަރަޙައްދުތައް އެމެރިކާ ފަދަ އިސްލާމްދީނާއި މުސްލިމުންނަށް ޢަދާވާތްތެރި ހުޅަނގު ބާރުތަކަށް، ގިނަ ފަހަރު އިސްލާމީ ބިންތަކައް ބޮންއަޅަން ދޫކޮށްލުމަކީ މުސްލިމުންގެ ތެރެއިން ގިނަ ބަޔަކު މި ދައުލަތްތަކުގެ ވަފާތެރިކަން އޮތީ އިސްލާމީ އުއްމަތައް ތޯ ނުވަތަ ހުޅަނގަށްތޯ ސުވާލު އުފައްދާ ހަރުކަށި އިބާރާތުން ކުށްވެރިކުރާކަމެކެވެ.
ހަމައެއާއިއެކު، މިދަނޑިވަޅުގައި ފަލަސްޠީނާއި ލުބުނާނުގެ މުސްލިމުން މަރައި ސުންނާފަތިކުރަމުންދާއިރު މި ޤައުމުތައް އަމިއްލަ އަވަށްޓެރި މުސްލިމުންގެ ދިފާޢުގައި އެއްވެސް ކަމެއް ނުކޮށް ހަނުތިބޭ ތިބުމާމެދުވެސް އިސްލާމީ އުއްމަތުގެ ގިނަ މުސްލިމުންދަނީ ފާޑުކިޔާ ސުވާލު އުފައްދަމުންނެވެ.
