ދުނިޔޭގެ ތެލެސީމިއާ ދުވަހާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަނބިކަނބަލުން މެޑަމް ސާޖިދާ މުޙައްމަދު މިއަދު ޚާއްޞަ މެސެޖެއް ދެއްވައިފިއެވެ.
މި ދުވަހުގެ މުނާސަބަތުގައި ސޯޝަލް މީޑިއާގައި ކުރެއްވި ޕޯސްޓެއްގައި މެޑަމް ސާޖިދާ ވިދާޅުވީ، ތެލެސީމިއާ ކުދިންނަށް ދެވޭ ފަރުވާގެ އެންމެ މުހިންމު އެއް ބަޔަކީ މުޖުތަމައުގެ ފަރާތުން އެ ކުދިންނަށް ލިބޭ ހިތްވަރު ކަމަށެވެ. މިގޮތުން، އެންމެންގެ ފަރާތުން ލިބޭ އޯގާތެރިކަމާއި ބޭނުންކުރާ ހެޔޮބަސްތަކަކީ އެ ކުދިންނަށް ދެވޭ ފަރުވާގެ ދެބައިކުޅަ އެއްބައިކަން އެކަމަނާ ފާހަގަކުރެއްވިއެވެ.
މެޑަމް ސާޖިދާގެ މެސެޖުގައި ވަނީ ތެލެސީމިއާއާ ދެކޮޅަށް ހިތްވަރާއެކު މަސައްކަތް ކުރަމުންދާ ކުދިންނަށާއި އާއިލާތަކަށް އިޚްލާޞްތެރި ހެޔޮދުޢާއެއް ފޮނުއްވާފައެވެ. އެކަމަނާ ވިދާޅުވީ ތެލެސީމިއާއަށް ފަރުވާ ހޯދާ ކޮންމެ ކުއްޖަކަށްމެ، މުޖުތަމަޢުގެ ކުލުނާއި ލޯތްބާއި އެހީތެރިކަމާއެކު، މާތްﷲ އަވަސް ޝިފާއެއް މިންވަރުކުރެއްވުމަކީ އެކަމަނާގެ ނުހަނު ބޮޑު އުންމީދެއް ކަމަށެވެ.
ތެލެސީމިއާ ދުވަސް ފާހަގަކުރުމުގެ މައިގަނޑު މަޤްޞަދަކީ މި ބައްޔަށް މުޖުތަމައު ހޭލުންތެރިކުރުވުމާއި، ބަލި ހުންނަ ކުދިންނަށް ބޭނުންވާ އަޅާލުމާއި އެހީތެރިކަން ފޯރުކޮށްދިނުމަށް ބާރުއެޅުމެވެ. މި ސަރުކާރުންވެސް ދަނީ ތެލެސީމިއާ ކުދިންނަށް ބޭނުންވާ ފަރުވާގެ ނިޒާމު ހަރުދަނާކޮށް، އެ ކުދިންނަށް ބޭނުންވާ ޚިދުމަތްތައް ފަސޭހައިން ލިބޭނެ މަގުތައް ފަހިކޮށްދިނުމަށް ގިނަ މަސައްކަތްތަކެއް ކުރަމުންނެވެ.
