ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރާއްޖޭން ބޭރަށް ކުރެއްވި ފަސް ދަތުރުފުޅަކަށް ހަރަދުވި ފައިސާގެ ތަފްސީލު ސަރުކާރުގެ އިސް ތަރުޖަމާނު މުޙައްމަދު ޙުސައިން ޝަރީފް (މުންދު) ހާމަކުރައްވައިފިއެވެ.
މި ތަފްސީލުތައް މުންދު ހާމަކުރެއްވީ އިއްޔެ ބޭއްވި ނޫސްވެރިންގެ ބަލަދަލުވުމުގައި، މަޢުލޫމާތު ހޯދައި ލިބިގަތުމުގެ ޙައްޤުގެ (އާރްޓީއައި) ދަށުން ނޫސްވެރިއަކު ކުރި ސުވާލަކަށް ޖަވާބު ދެއްވަމުންނެވެ.
މުންދު ވިދާޅުވި ގޮތުގައި، 2025 ވަނަ އަހަރުގެ ޑިސެމްބަރު މަހުން ފެށިގެން މިހާތަނަށް ރައީސް އޮފީހަށް ޖުމްލަ 288 އާރްޓީއައި ހުށަހަޅާފައިވެއެވެ. އޭގެ ތެރެއިން 233 އާރްޓީއައިއަކަށް މިހާރު ޖަވާބު ދީފައިވާ ކަމަށާއި، ބާކީ ހުރި ކަންކަމުގެ މަޢުލޫމާތު އެއްކުރުމުގެ މަސައްކަތް ކުރިއަށްދާ ކަމަށް އޭނާ ވިދާޅުވިއެވެ.
ނޫސްވެރިންގެ ހާއްސަ ޝައުގުވެރިކަމެއް ހުންނަ ދާއިރާއަކީ ރައީސްގެ ދަތުރުފުޅުތަކުގެ ޚަރަދުތައްކަން ފާހަގަކުރައްވަމުން، މުންދު ވަނީ ފަސް ދަތުރުފުޅެއްގެ ތަފްސީލު ހިއްސާކުރައްވާފައެވެ. އެގޮތުން ހާމަކުރެއްވި ހިސާބުތަކަކީ:
މެލޭޝިއާ ދަތުރުފުޅު (27 އޭޕްރިލް 2025): 245,170 ރުފިޔާ
ސިންގަޕޫރު ދަތުރުފުޅު (29 ޖޫން 2025): 2.272 މިލިއަން ރުފިޔާ
އިނގިރޭސިވިލާތުގެ ދަތުރުފުޅު (15 ޖުލައި 2025): 1.571 މިލިއަން ރުފިޔާ
ޤަޠަރުގެ ދޯހާ ދަތުރުފުޅު (14 ސެޕްޓެމްބަރު 2025): 570,971 ރުފިޔާ
އިނގިރޭސިވިލާތުގެ ދަތުރުފުޅު (29 ނޮވެމްބަރު 2025): 807,411 ރުފިޔާ
ދަތުރުފުޅުތަކުގެ މަޢުލޫމާތު ހާމަކުރުމުގައި ލަސްތަކެއް ދިމާވާ ސަބަބާ ގުޅޭގޮތުން މުންދު ވިދާޅުވީ، އެފަދަ މަޢުލޫމާތުތަކަކީ ވަގުތުން ވަގުތަށް ދެވޭނެ މަޢުލޫމާތުތަކެއް ނޫން ކަމަށެވެ. ނަމަވެސް، ބޭނުންވާ ތަފްސާހިސާބުތައް ލިބެމުންދާ ވަރަކަށް އެ މަޢުލޫމާތުތައް ނޫސްވެރިންނާ ހިއްސާކުރަމުން ގެންދަވާނެ ކަމުގެ ޔަގީންކަން ތަރުޖަމާނު ދެއްވިއެވެ.
