ހުޅުމާލޭގެ ދެވަނަ ފިޔަވަހީގައި ތަރައްގީކުރަމުންދާ 4,000 ހައުސިންގ ޔުނިޓްގެ ލޭންޑްސްކޭޕިންގ ނުވަތަ ގޯތިތެރެ ޒީނަތްތެރިކުރުމުގެ މަސައްކަތްތައް ހުއްޓިފައިވާ ކަމަށް ބުނެ ސޯޝަލް މީޑިއާގައި ކުރަމުންދާ ތުހުމަތުތަކަށް ފަހިދިރިއުޅުން ކޯޕަރޭޝަން (އެފްޑީސީ) ގެ މެނޭޖިންގ ޑިރެކްޓަރ ހަމްދާން ޝަކީލް ރައްދުދެއްވައިފިއެވެ.
މި މައްސަލަ ފެންމަތިވީ، އެފްޑީސީގެ ރަސްމީ އެކްސް އެކައުންޓުން އެ ސަރަހައްދުގައި ކުރިއަށްގެންދާ ފެހިކުރުމުގެ މަސައްކަތްތަކުގެ ފޮޓޯތަކެއް ހިއްސާކުރުމާ ގުޅިގެން، އިދިކޮޅު އެމްޑީޕީގެ އެކްޓިވިސްޓަކު ކުރި ސުވާލަކުންނެވެ. އެ އެކްޓިވިސްޓް ވަނީ މި މަސައްކަތް މުޅިން ހުއްޓިފައިވާ ކަމަށް ބުނެ، މަސައްކަތް އަލުން ފަށާނީ ކޮން އިރަކުންތޯ ސުވާލުކޮށްފައެވެ. އަދި އެ ސަރަހައްދުގައި ވަރަށް ބޮޑަށް ހިރަފުސް ބޮޑުވެފައިވާ ކަމަށާއި، މިއީ ހަމައެކަނި ޕީއާރު ސްޓަންޓެއްތޯވެސް އޭނާ ވަނީ ސުވާލު އުފައްދާފައެވެ.
މި ތުހުމަތުތަކަށް ރައްދުދެއްވަމުން ހަމްދާން ޝަކީލް ވިދާޅުވީ، ސޯޝަލް މީޑިއާގައި މަގުބޫލުކަން ހޯދުމަށްޓަކައި އަދި ޚާއްޞަކޮށް ހުކުރު ދުވަހަށް އެރިއިރާއެކު ދޮގު މައުލޫމާތު ނުފެތުރުމަށް އެދޭ ކަމަށެވެ. މަސައްކަތް ހުއްޓުމެއްނެތި ކުރިއަށްދާކަން ސާބިތުކޮށްދިނުމަށްޓަކައި ހަމްދާން ވަނީ ބުރާސްފަތި ދުވަހު އެ ސައިޓުގައި މަސައްކަތް ހިނގަމުންދާ މަންޒަރު ފެންނަ ވީޑިއޯއެއްވެސް ހިއްސާކުރައްވާފައެވެ.
It’s Friday, don’t lie for social media clout. Work is on going – attached video is from Thursday. The entire work is phased out, due to requests we received from wheelchair bound tenants, we are prioritising installing the footpaths first for all towers before installing paving… pic.twitter.com/5UQVTKDt0B
— Hamdhan Shakeel (@HamdhanShakeel) May 8, 2026
ހަމްދާން އިތުރަށް ތަފްސީލުކޮށްދެއްވި ގޮތުގައި، މި މަޝްރޫއުގެ މަސައްކަތްތައް ކުރިއަށްގެންދަނީ އެކި ފިޔަވަހިތަކަށް ބަހާލައިގެންނެވެ. އެގޮތުން، ފްލެޓްތަކުގައި ދިރިއުޅޭ ފުރޮޅުލީ ގޮނޑި ބޭނުންކުރާ ފަރާތްތަކުން ހުށަހެޅި އެދުމަކަށް އިސްކަންދީގެން، މިހާރު އެންމެ އިސްކަމެއް ދީގެން ކުރިއަށްދަނީ ހުރިހާ ޓަވަރުތަކެއްގެ ކައިރީގައި ދުވާރު (ފުޓްޕާތް) ހެދުމުގެ މަސައްކަތެވެ. ޕޭވިންގ ބްލޮކް ޖެހުމާއި މުޅި ސަރަހައްދު ފެހިކުރުމުގެ މަސައްކަތްތައް ކުރިއަށްދާނީ މި މަސައްކަތް ނިމުމުން ކަމަށް އޭނާ ވިދާޅުވިއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ބޯހިޔާވަހިކަމުގެ މަޝްރޫއުތައް އަވަސްކުރުމަށް ދެއްވާ އިސްކަމާއެކު، އެފްޑީސީން ދަނީ ފްލެޓްތަކުގެ ބާކީ ހުރި މަސައްކަތްތައް ނިންމައި، އާންމުންނަށް ލުއިފަސޭހަ މާހައުލެއް ގާއިމުކޮށްދިނުމަށް ގިނަ މަސައްކަތްތަކެއް ކުރަމުންނެވެ.
