ވޮޝިންގޓަން / ތެހެރާން – އެމެރިކާގެ ޑިޕްލޮމެސީގެ ފަހަތުގައި ފޮރުވިފައިވާ ހަނގުރާމައިގެ ޙަޤީޤަތް، ހޮރްމޫޒް ކަނޑުއޮޅިން އަނެއްކާވެސް ފެނިއްޖެއެވެ. އެމެރިކާއާއި އީރާނުގެ ސިފައިންގެ މެދުގައި މިސައިލާއި ޑްރޯން ބޭނުންކޮށްގެން ސީދާ ޙަމަލާތަކެއް ބަދަލުކުރެވުނު ނަމަވެސް، އެމެރިކާގެ ރައީސް ޑޮނަލްޑް ޓްރަމް ބުނަނީ ”ސުލްޙަ އަދިވެސް އެބައޮތް“ ކަމަށެވެ. އަދި އީރާނަށް ދިން ބޮޑެތި ޙަމަލާތަކަކީ ހަމައެކަނި ”ލޯބީގެ ކޮއްޓާލުމެއް“ (ލަވް ޓެޕް) ކަމަށް އޭނާ ވަނީ ސިފަކޮށްފައެވެ.
ޙަމަލާތައް ބަދަލުކުރެވުނު ގޮތް
އީރާނުގެ އަސްކަރިއްޔާއިން މަޢުލޫމާތު ދޭގޮތުގައި، މި ޙަމަލާތައް ފެށުނީ އެމެރިކާގެ ސިފައިން އީރާނުގެ އައްސޭރިފަށުގައި އޮތް ތެޔޮ ޓޭންކަރަކަށާއި، ޔޫ.އޭ.އީ ގެ ފުޖައިރާ ބަނދަރު ކައިރީގައި އޮތް އެހެން އުޅަނދަކަށް ޙަމަލާދިނުމުންނެވެ. މީގެ އިތުރުން ދެކުނު އީރާނުގެ ބަންދަރް ޚަމީރު، ސިރިކް، އަދި ގޭޝްމް އައިލެންޑް ފަދަ ޢާންމުން ދިރިއުޅޭ ސަރަޙައްދުތަކަކަށް އެމެރިކާއިން ވަނީ ވައިގެ ޙަމަލާތަކެއް ދީފައެވެ.
ނަމަވެސް، އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުނަނީ، ހޮރްމޫޒް ކަނޑުއޮޅީގައި ތިބި އެމެރިކާގެ ކަނޑުގެ ސިފައިންނަށް އީރާނުން ޙަމަލާދިނުމުން، އެކަމުގެ ރައްދުގައި އީރާނުގެ އަސްކަރީ މަރުކަޒުތަކަށް ޙަމަލާދިނީ ކަމަށެވެ.
އޮޅުވާލާފައިވާ ”ސުލްޙަ“ އާއި ދެފުށް ދެގޮތް ސިޔާސަތު
މިނިވަން ދައުލަތެއްގެ ސަރަޙައްދުތަކަށާއި އިޤްތިޞާދީ ވަސީލަތްތަކަށް ބޮންއެޅުމަށްފަހު، އެއީ އާދައިގެ ކަމެއްކަމަށް ހެދުމަކީ ބައިނަލްއަޤްވާމީ ޤާނޫނުތަކަށް ކުރާ ވަރަށް ބޮޑު މަލާމާތެކެވެ. ޓްރަމް ވަނީ ”އަހަރެމެން އެމީހުން ފުނޑުފުނޑުކޮށްލިން“ ކަމަށް ނޫސްވެރިންގެ ގާތުގައި ވިދާޅުވެފައެވެ. އަދި ހަމައެއާއެކު ސުލްޙައިގެ ވާހަކަތައް ”ވަރަށް ރަނގަޅަށް ކުރިއަށްދާކަމަށް“ ވެސް ވިދާޅުވިއެވެ. މިއީ އެމެރިކާގެ ޚާރިޖީ ސިޔާސަތުގެ ނުރައްކާތެރިކަން ހާމަވާ ކަމެކެވެ.
ޖިއޯޕޮލިޓިކަލް މާހިރުން ދެކޭގޮތުގައި މިއިން ސާބިތުވަނީ، ހުޅަނގުން ގެންނަ ”ސުލްޙަ“ އަކީ ހަމައެކަނި ނަމެއްގައި އޮންނަ އެއްޗެއް ކަމެވެ. އެމީހުން ބޭނުން އިރަކު ބޭނުން ޤައުމަކަށް ޙަމަލާދީ، އިޤްތިޞާދު ފުނޑުފުނޑުކޮށްލުމަށްފަހު، އެއީ ޑިޕްލޮމެސީ ކަމަށް ބުނެ އޮޅުވާލައެވެ. މި އިސްތިޢުމާރީ ސިޔާސަތުތައް ނިމުމަކަށް ނާންނަހާ ހިނދަކު، މެދުއިރުމަތީގައި ޙަޤީޤީ ސުލްޙައެއް ޤާއިމެއް ނުކުރެވޭނެއެވެ.
