ވެފައިވާ ބައެއް ވައުދުތަކަށް އެ އިރެއްގައި އޮންނަ ހާލަތަކާއި ވަގުތަކާއި ގުޅިގެން ބަދަލު އަންނާނެ ކަމަށް ރައީސުލްޖުމްހޫރިއްޔާގެ އޮފީހުގެ އިސް ތަރުޖަމާނު މުޙައްމަދު ޙުސައިން ޝަރީފް (މުންދު) ވިދާޅުވެއްޖެއެވެ.
މުންދު މި މޭރުމުން ވިދާޅުވީ، ޕްރެސަރ ވިތް ސްޕޮކްސްގެ ނަމުގައި ޓެލެވިޒަން މޯލްޑިވްސްގައި ކުރިއަށްގެންދިޔަ ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުންނެވެ. މުންދު ވިދާޅުވީ، ވެފައިވާ ބައެއް ވައުދުތަކަށް އެ އިރެއްގައި އޮންނަ ހާލަތަކާއި ވަގުތަކާއި ގުޅިގެން ބަދަލު އަންނާނެ ކަމަށައި އެގޮތުގެ މަތިން މިހަރު ވެސް ބައެއް ވައުދުތަކަށް ބަދަލުގެނެވިފައިވާ ކަމަށެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވައުދުފުޅުތައް ޕަބްލިޝްކުރެވިފައިވާކަން ފާހަގަކުރައްވަމުން މުންދު ވިދާޅުވީ، އެ ވައުދުފުޅުތަކަކީ އެމަނިކުފާނު ވެރިކަމާއި ހަވާލުވެވަޑައިގަތުމުގެ ކުރިން ވެވަޑައިގެންފައިވާ ވައުދުފުޅުތަކެއް ކަމަށެވެ.
މީގެ އިތުރުން ސަރުކާރުގެ ސިޔާސީ މުވައްޒަފުންގެ އަދަދު 700 އަށްވުރެ ގިނަ ނުކުރެއްވުމަކީ ވެސް ރައީސްގެ ވައުދުފުޅެއްކަން ވެރިކަމާ ހަވާލުވެވަޑައިގެންނެވުމުގެ ކުރިން، އިންތިގާލީ މަރުހަލާގައި ހާމަކޮށްފައިވާނެ ކަމަށާއި، ނަމަވެސް ވެރިކަމާ ހަވާލުވުމަށްފަހު ބައެއް ކަންކަން ރިވައިސް ކުރެވިފައިވާ ކަމަށް މުންދު ވިދާޅުވިއެވެ.
”ވައުދަކަށް މިވަނީ އަޅުގަނޑުމެން ސަރުކާރަށް އައިސްފައި، ސިޗުއޭޝަންއަށް ބަލާފައި. އަނެއްކާ ބައެއް ވަޢުދުތައް ހުންނާނެ އަޅުގަނޑުމެން ރިވައިސްވެސް ކޮށްފައި ބޭސްޑް އޮން ސިޗުއޭޝަން. އެމްބިޝަސްވެސް ކޮށްފައި ހުންނާނެ ބައެއްކަންކަން. 700 އަކީ އޭރުގައި ނެރުނު ފިގާއެކޭ. ވައުދުތަކުގެ ގޮތުގައި ހުރިހާ ވަޢުދެއް ހުންނާނެ ލިސްޓްކުރެވިފައި.“ – އިސް ތަރުޖަމާނު މުޙައްމަދު ހުސައިން ޝަރީފް ވިދާޅުވިއެވެ.
މީގެ އިތުރުން ވެރިކަމާ ހަވާލުވެވަޑައިގެންނެވުމަށްފަހު ރިޔާސީ ބަޔާންތަކުގައި ވެސް އެމަނިކުފާނު ވައުދުތައް ވެވަޑައިގެންފައިވާކަން ފާހަގަކުރައްވަމުން މުންދު ވިދާޅުވީ، އެފަދަ ކަންކަމަކީ އެއިރެއްގައި އޮންނަ ހާލަތަކާއި ވަގުތާއި ގުޅިގެން ބަދަލު އައިސްދާނެ ކަންކަން ކަމަށެވެ. ހަމައެހެންމެ އެސްއޯއީތަކުގެ ހަރަދު ކުޑަކުރުމުގެ ގޮތުން ކުންފުނިތަކުގެ މުވައްޒަފުންގެ އަދަދު ތިން ބައިކުޅަ އެއްބައި މަދުކުރުމަށް ނިންމައި އެ މަސައްކަތް މިހާރު ފެށިފައިވާ ކަމަށް މުންދު ވަނީ އިތުރަށް ވިދާޅުވެފައެވެ.
