ބޭންކް އޮފް މޯލްޑިވްސް (ބީއެމްއެލް) ގެ ޑެބިޓު ކާޑުތަކަށް ވިއްކާ ޑޮލަރުގެ ލިމިޓަށް ގެނައި ބަދަލުތަކާއި މިދިޔަ މަހުގެ ތެރޭގައި ސަރުކާރުން ދެއްކި ބޭރުގެ ދަރަނިތަކާ އެއްވެސް ގުޅުމެއް ނެތް ކަމަށް ރައީސުލްޖުމްހޫރިއްޔާގެ އޮފީހުގެ އިސް ތަރުޖަމާނު މުޙައްމަދު ޙުސައިން ޝަރީފް (މުންދު) މިއަދު ވިދާޅުވެއްޖެއެވެ.
މުންދު މި މޭރުމުން ވިދާޅުވީ، ޕްރެސަރ ވިތް ސްޕޮކްސްގެ ނަމުގައި ޓެލެވިޒަން މޯލްޑިވްސްގައި މިއަދު ކުރިއަށްގެންދިޔަ ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުންނެވެ. ބީއެމްއެލްގެ ފަރާތުން މިއީ ކިހިނެއް ހިނގައިދިޔަ ކަމެއްކަން ވަރަށް ތަފުސީލުކޮށް ކިޔައިދީފައިވާކަން ފާހަގަކުރައްވަމުން މުންދު ވިދާޅުވީ، ސަރުކާރުން ދެއްކި ދަރަނިތަކާއި ކާޑު ލިމިޓަށް ގެނައި ބަދަލުތަކާ އެއްވެސް ގުޅުމެއް ނެތް ކަމަށެވެ.
މިކަމުގައި، ތި އިންފަރެންސް ނުހައްދަވާށޭ އަޅުގަނޑުމެން މި ދެއްކި ލޯނުތަކާއި ނުވަތަ އަޅުގަނޑުމެން މި ކްލިއާ ކުރި އެފެކްސް ސްވޮޕްއާ، އެއާ ގުޅިގެނެއް އަޅުގަނޑުމެންގެ ކޭޝް ފްލޯއަކާއި އެހެން އެއްޗަކަށެއް ނާދޭ ލޮޅުމެއް ނުވަތަ ޑިފިކަލްޓީއެއް. އެހެންވީމަ، ސަރުކާރުން އަޅުގަނޑުމެން މިދިޔަ މަހުގެ ތެރޭގައި މި ދެއްކި ފައިސާ ނުވަތަ ކްލިއަރ ކުރި ދަރަނިތައް ކްލިއަރ ކުރުމަކާ ބީއެމްއެލްގެ މިކަމަކާ ގުޅުމެއް ނެތް އިނގޭތޯ،“ – މުންދު ވިދާޅުވިއެވެ.
ފާހަގަކޮށްލެވޭ ގޮތުގައި ރާއްޖެއިން ބޭރަށް ނުދާ ފަރާތްތަކުގެ ކާޑު ހިފައިގެން ބޭރުގެ ގައުމުތަކުގައި ކާޑުގެ މުއާމަލާތް ކުރާ މައްސަލަ ފަހަކަށް އައިސް ވަނީ ވަރަށް ބޮޑަށް އިތުރުވެފައެވެ. އެހެންކަމުން ބީއެމްއެލްއިން ވަނީ އިމިގްރޭޝަނާއި ގުޅިގެން މި މައްސަލަ ހައްލުކުރުމަށް ވަރަށް ވަރުގަދަ ފިޔަވަޅުތަކެއް އެޅުމަށް ނިންމައިފައެވެ.
އެގޮތުން ރާއްޖެއިން ބޭރުގައި ޕީއޯއެސް އަދި އޭޓީއެމްތަކުގައި ބޭނުންކުރާ ”ފޮރިން ސްޕެންޑް ލިމިޓް“ ހަމައެކަނި ރާއްޖެއިން ބޭރުގައި ތިބޭއިރު އެކްޓިވޭޓްވާ ގޮތަށް ބީއެމްއެލް މިހާރު ވަނީ ހަމަޖައްސައިފައެވެ.
މީގެ އިތުރުން، ބައެއް ފަރާތްތަކުން ވިޔަފާރީގެ ބޭނުމަށް، އަމިއްލަ ބޭނުމަށް ދޫކޮށްފައިވާ ރުފިޔާ ކާޑުތަކުން ބައެއް އޮންލައިން ވިޔަފާރި ސައިޓުތައް މެދުވެރިކޮށް ވިޔަފާރިކުރަމުންދާތީ އެ މައްސަލަ ހައްލުކުރުމަށް ބީއެމްއެލްއިން ވަނީ ކޮންމެ ކަސްޓަމަރަކަށް މަހެއްގެ މައްޗަށް ހެދޭ ޓްރާންސެކްޝަންގެ އަދަދު 30 އަށް ކަނޑައަޅައިފައެވެ.
