ސަރުކާރުން އަލަށް ތަޢާރަފުކުރުމަށް ނިންމާފައިވާ ޓެކްސީ ލައިންގެ ޚިދުމަތަކީ އަމިއްލަ ޓެކްސީ ވިޔަފާރިތަކުގެ ތެރެއަށް ވަނުން ނޫން ކަމަށާއި، އޭގެ ބަދަލުގައި އެއީ ރައްޔިތުންނަށް ދޭ އަސާސީ ޚިދުމަތެއްގެ ފެންވަރު ރަނގަޅުކުރުމަށް ކުރާ މަސައްކަތެއް ކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި، ސަރުކާރުން ޓެކްސީ ލައިނެއް ތަޢާރަފުކުރުމަކީ އަމިއްލަ ވިޔަފާރިތަކަށް އޮތް ހުރަހެއްތޯ ނޫސްވެރިއަކު ކުރި ސުވާލަކަށް ޖަވާބު ދެއްވަމުން ވަޒީރު ވިދާޅުވީ، އެއީ މުޅިއަކުން އެހެން އޮތް ކަމެއް ނޫން ކަމަށެވެ. އަދި ސަރުކާރުގެ އަމާޒަކީ ރައްޔިތުންނަށް ބޭނުންވާ އަސާސީ ޚިދުމަތެއް އެންމެ އެކަށީގެންވާ ކޮލިޓީގައި ފޯރުކޮށްދިނުމަށް މަގުދެއްކުން ކަމަށް އޭނާ ފާހަގަކުރެއްވިއެވެ.
”ސަރުކާރުން އެ މަސައްކަތް ކުރަނީ އަސާސީ ޚިދުމަތެއް ރައްޔިތުން ބޭނުންވާ ފެންވަރަށް ގެނެވޭތޯ. އަދި ސަރުކާރުން ނުބުނޭ ކުރިމަގުގައި އެކަން ގެންދާނެ ދާއިމީ އިންތިޒާމަކީ ކޮބައިކަމެއް،“ ވަޒީރު ސަޢީދު ވިދާޅުވިއެވެ.
ވަޒީރު އިތުރަށް ވިދާޅުވީ، މިވަގުތު ސަރުކާރުން ނިންމާފައިވަނީ އެމްޓީސީސީ މެދުވެރިކޮށް، ރައްޔިތުން ބަލައިގަންނަ ފަދަ ވަކި މިންގަނޑުތަކެއްގެ ތެރެއިން މި ޚިދުމަތް ފެށުމަށެވެ. އަދި މިކަމުގެ ސަބަބުން ޓެކްސީގެ ޚިދުމަތަށް އާ ގޮތްތަކާއި އާ އީޖާދުތައް ތަޢާރަފުވެގެންދާނެ ކަމަށްވެސް އޭނާ ވިދާޅުވިއެވެ.
ޓެކްސީގެ ޚިދުމަތް ދިނުމުގައި ހުރި ގޮންޖެހުންތަކަށް އަލިއަޅުއްވާލައްވަމުން ވަޒީރު ވިދާޅުވީ، ކޮންމެ ބަޔަކު މި ޚިދުމަތް ފެށިކަމުގައިވިޔަސް ރަނގަޅުކުރަންޖެހޭ ކަންތައްތަކެއް ހުންނާނެ ކަމަށެވެ. އޭގެ ތެރޭގައި ފޯނު ކޯލްތަކަށް ޖަވާބުދިނުމާއި، ދަތުރުތަކަށް ބަރާބަރަށް އެޓެންޑްވުމާއި، އަދި ޑްރައިވަރުން ފަސިންޖަރުންނާ މުޢާމަލާތްކުރާއިރު ރީތި އަޚުލާޤެއް ގެންގުޅުން ފަދަ ކަންކަން ހިމެނޭކަން އޭނާ ފާހަގަކުރެއްވިއެވެ.
ވަޒީރު ސަޢީދު ވިދާޅުވި ގޮތުގައި، އެމްޓީސީސީން މި ޚިދުމަތުގެ ތެރެއަށް ވަންނަނީ ވިޔަފާރިއެއްގެ ގޮތުގައި އަމިއްލަ ފަރާތްތަކާ ވާދަކުރުމުގެ ބަދަލުގައި، ޚިދުމަތުގެ ފެންވަރު މަތިކޮށް ރަނގަޅު ނަމޫނާއެއް ދެއްކުމުގެ މަޤްޞަދުގައެވެ.
