ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލެ ދެވަނަ ފިޔަވަހީގައި ތަރައްގީކޮށްފައިވާ ފުލެޓްތަކުގައި ރަށްވެހިކުރުމުގައި އެއްވެސް ހުރަހެއް މިހާރު ނޯންނާނެ ކަމަށް އެފްޑީސީގެ މެނޭޖިންގ ޑިރެކްޓަރު ހަމްދާން ޝަކީލް ވިދާޅުވެއްޖެއެވެ.
މިކަމާ ގުޅިގެން ހަމްދާން ވިދާޅުވީ، އެފްޑީސީގެ ފަރާތުން މިދިޔަ އަހަރުގެ އޮގަސްޓު މަހުގެ 17 ވަނަ ދުވަހު މާލެ ސިޓީ ކައުންސިލާއި ބައްދަލުކޮށްފައިވާނެ ކަމަށާއި، މި ބައްދަލުވުމުގައި ފުލެޓް ލިބިފައިވާ ފަރާތްތައް ފުލެޓްތަކުގައި ރަށްވެހިކުރުމާ ގުޅޭގޮތުން ކައުންސިލަށް ބޭނުންވަނީ ކޮން ޑޮކިއުމެންޓޭޝަނެއްތޯ ސާފުކޮށްފައިވާނެ ކަމަށެވެ.
މި މައްސަލައިގައި ސިޓީ ކައުންސިލާއިއެކު މަޝްވަރާތައް ކުރުމަށް އެފްޑީސީން ވަނީ ސިޓީ ކައުންސިލާއިއެކު އިއްޔެ ބައްދަލުވުމެއް ވެސް ބާއްވައިފައެވެ. އެ ބައްދަލުވުމަށްފަހު އެފްޑީސީގެ ފްލެޓްތަކުގެ ވެރިންނަށް އެ ފަރާތްތަކުން ދިރިއުޅޭ ފުލެޓުތަކުގައި ރަށްވެހިކުރުމަށް އެއްވެސް ހުރަހެއް ސިޓީ ކައުންސިލަކަށް މިހާރު ނޯންނާނެ ކަމަށް ހަމްދާން ވަނީ ވިދާޅުވެފައެވެ.
މީގެ އިތުރުން ފުލެޓު ލިބުނު ފަރާތްތަކުގެ ތެރެއިން އެ ފްލެޓްތަކަށް ރަށްވެހިކަން ބަދަލުކުރަން އެދޭ ފަރާތްތަކަށް އެކަމަށް ބޭނުންވާ ހުރިހާ ލިޔެކިޔުމެއް އެފްޑީސީގެ ޕޯޓަލް މެދުވެރިކޮށް ލިބޭނެ އިންތިޒާމު ހަމަޖެހިފައިވާ ކަމަށްވެސް ހަމްދާން ވިދާޅުވިއެވެ.
”އަޅުގަނޑުމެންގެ ޕޯޓަލް މެދުވެރިކޮށް ސަރުކާރުގެ ޑިޖިޓަލައިޒޭޝަން ރޯޑްމެޕާއި އެއްގޮތަށް އެއްވެސް ފިޒިކަލް ޑޮކިއުމެންޓޭޝަނެއް ހުށަނާޅައި އޮންލައިންކޮށް ވަން ކްލިޕް މެދުވެރިކޮށް ސިޓީ ކައުންސިލަށް ބޭނުންވާ ހުރިހާ ލިޔުމެއް އެފްޑީސީގެ ޕޯޓަލް މެދުވެރިކޮށް ލިބޭނެ ނިޒާމެއް މިވަނީ ހަމަޖެހިފައި“ ހަމްދާން ޝަކީލް ވިދާޅުވިއެވެ.
އެފްޑީސީ ފުލެޓްތަކުގައި ރަށްވެހިކުރުމަށް އިދާރީ ގޮތުން އެއްވެސް ހުރަހެއް ނޯންނާނެ ކަމުގެ ޔަގީންކަން ދެއްވަމުން ހަމްދާން ވިދާޅުވީ، ސިޓީ ކައުންސިލުން ވެސް މިކަމުގައި ލުއިފަސޭހަ ގޮތްތަކެއް ހަމަޖައްސައިދިނުމަކީ އުއްމީދުކުރައްވާ ކަމެއް ކަމަށެވެ.
