މާލެ ސިޓީ ގަލޮޅު އަވަށުގައި ހުންނަ މޯޗަރީ، ހުޅުމާލޭ ސަހަރާ މިސްކިތް ހުރި ބިމަށް ބަދަލުކުރަން މާލޭ ސިޓީ ކައުންސިލުން ނިންމައިފިއެވެ.
މިކަމާ ގުޅިގެން ސިޓީ ކައުންސިލުން ކޮށްފައިވާ އިއުލާނުގައި ބުނެފައިވަނީ، ގަލޮޅު މޯޗަރީ މިހާރު ހުރި ބިމުން ހުޅުމާލޭ ސަހަރާ މިސްކިތް ހުރި ބިމަށް ބަދަލުކުުރުމުގެ މަސައްކަތް ކޮށްދޭނެ ބަޔަކު ބޭނުންވާ ކަމަށެވެ.
މިކަމާ ގުޅޭ މައުލޫމާތު ސާފުކުރުން މި މަހުގެ 10 ވާ އާދިއްތަ ދުވަހުގެ ހެނދުނު 10:00 ގައި މާލޭ ސިޓީ ކައުންސިލުގެ ހޯލުގައި އޮންނާނެއެވެ. މީގެ އިތުރުން މަސައްކަތުގެ އަގު ހުށަހެޅުން އޮންނާނީ މި މަހުގެ 14 ވާ ބުރާސްފަތި ދުވަހުގެ މެންދުރުފަހު 13:30 ގައި ކަމަށް ސިޓީ ކައުންސިލުން ވަނީ ބުނެފައެވެ.
ގަޑިއަށް މައުލޫމާތު ސާފުކުރުމަށް ނުދާ ފަރާތްތަކާއި ގަޑި ޖެހުމަށްފަހު އަންދާސީ ހިސާބު ހުށަހަޅާ ފަރާތްތަކުގެ އަންދާސީ ހިސާބު ބަލައިނުގަންނާނެކަން ފާހަގަކުރަމުން ސިޓީ ކައުންސިލުން ބުނެފައިވަނީ، މަސައްކަތުގެ އަގު ހުށަހެޅުމުގައި ބައިވެރިވެވޭނީ ދިވެހި ކުންފުނިތަކާއި ޕާޓްނާޝިޕް، ލޯކަލް އިންވެސްޓްމަންޓް އަދި ވިޔަފާރިކުރުމުގެ ހުއްދަ ލިބިފައިވާ ފަރާތްތަކަށް އެކަނި ކަމަށެވެ.
ގަލޮޅު މޯޗަރީ މިހާރު ހުރި ސަރަހައްދުން އެހެން ސަރަހައްދަކަށް ބަދަލުކުރަން ނިންމީ އެތަނުގެ ކެޕޭސިޓީ އިތުރު ކުރުމަށް ކަމަށް ސިޓީ ކައުންސިލުން ވަނީ މީގެ ކުރިން ބުނެފައެވެ.
