އޭޑީއެޗްޑީ ހުންނަ ކުދިންނަށް ދޭ މުހިންމު ބޭހެއް ކަމަށްވާ ”މިތައިލްފެނިޑޭޓް“ ރާއްޖޭގައި މަނާކޮށްފައިވާ ބޭސްތަކުގެ ލިސްޓުން އުނިކުރަން ފެންނަ ކަމަށް ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީން ފާސްކޮށްފިއެވެ.
ރައްޔިތުންގެ މަޖިލީހަށް މި މައްސަލަ ހުށަހެޅުއްވީ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް (ކުޑޫ) އެވެ.
މިކަމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންގެ މަޖިލީހަށް ފޮނުއްވި ސިޓީފުޅެއްގައި ވިދާޅުވީ، ނޭޝަނަލް ޑްރަގް ކޮންޓްރޯލް ކައުންސިލުން ދީފައިވާ ލަފައާއި އެއްގޮތަށް، ރާއްޖޭގައި މަނާކޮށްފައިވާ ބޭސްތަކުގެ ލިސްޓުން މިތައިލްފެނިޑޭޓް އުނިކުރުމަށް ހުސްވި އޭޕްރީލް މަހުގެ ތެރޭގައި ކެބިނެޓުން ނިންމާފައިވާ ކަމަށެވެ.
އެހެންނަމަވެސް މަސްތުވާތަކެއްޗާ ބެހޭ ގާނޫނުގެ ދަށުން މި ލިސްޓަށް ބަދަލު ގެނައުމުގެ ކުރިން ރައްޔިތުންގެ މަޖިލީހުގެ ރުހުން ބޭނުންވާތީ މި މައްސަލައިގައި ވަކިގޮތެއް ނިންމަވައިދެއްވުމަށް ރައީސް ވަނީ އެދިވަޑައިގެންފައެވެ.
ރާއްޖޭގައި މަނާކޮށްފައިވާ ބޭސްތަކުގެ ލިސްޓުގައި މިތައިލްފެނިޑޭޓް ހިމެނިފައިވަނީ މަސްތުވާތަކެއްޗާ ބެހޭ ގާނޫނުގެ ޖަދުވަލު އެކެއްގައި އެއީ މަނާ އެއްޗެއްގެ ގޮތުގައި ބަޔާންކޮށްފައި އޮތުމުންނެވެ. މިއީ އަސާސީ ބޭހެއް ނަމަވެސް، ގާނޫނީ މިފަދަ ހުރަސްތަކާ ހުރެ ރާއްޖެއިން މި ބޭސް ލިބެން ނުހުންނަކަން ފާހަގަކޮށްލެވެއެވެ.
