ގްރޭޓަރ މާލެ ކަނެކްޓިވިޓީ ބްރިޖް ނުވަތަ ތިލަމާލެ ބްރިޖުގެ ކޮލިޓީގައި އެއްވެސް މައްސަލައެއް ނޫޅޭ ކަމަށް ހައުސިންގ މިނިސްޓަރު ޑރ. ޢަބްދުﷲ މުއްޠަލިބް ވިދާޅުވެއްޖެއެވެ.
މިނިސްޓަރު މުއްޠަލިބް މި މޭރުމުން ވިދާޅުވީ ތިލަމާލެ ބްރިޖުގެ މަސައްކަތްތައް ކުރިއަށްދާގޮތް ބައްލަވާލެއްވުމަށް މަސައްކަތް ހިނގާ ސައިޓަށް ވަޑައިގެން ނޫސްވެރިންނާއި ބައްދަލުކުރައްވާ ވާހަކަދައްކަވަމުންނެވެ. މިނިސްޓަރު ވިދާޅުވީ، ބްރިޖާއި ގުޅުވައިގެން ބައެއް ފަރާތްތަކުން މީސް މީޑިއާގައި ތަފާތު ވާހަކަތަކެއް ފަތުރަމުން އަންނަ ކަމަށެވެ. އެގޮތުން ބްރިޖުގައި އަޑިގުޑަންތަކެއް ހުރި ކަމަށް ބުނެ އެ ފަރާތްތަކުން ވާހަކަދައްކަމުން އަންނަކަން މިނިސްޓަރު ވަނީ ފާހަގަކުރައްވައިފައެވެ.
”މިއީ ކުރަހާފައި އޮތް ބްރިޖެއް ނޫން، މިއީ ޑިޒައިންކޮށްފައި އިންޖީނިއަރކޮށްފައި އޮތް ޕްރޮޖެކްޓެއް، މާނައަކީ ދުރުން ފެންނަ ގޮތަކަށް ނޫނޭ ކޮންމެހެން ހުންނަން ޖެހޭނީކީ، އެ ބުނާ ކަހަލަ ޑިޕެއް ނުހުންނާނެ، މިއީ ލެގޯއެއް ގޮތަށް ވަކިވަކި ބައިތަކެއް ގެނެސްގެން ގުޅުވާ ސްޓްރަކްޗަރއަކަށް ވާތީ އެ ބުނާ ކަހަލަ ޑިފެކްޓް ހުރިނަމަ ހުރިހާ ސެގްމަންޓެއް ގުޅިގެން އެއްވަރު ވެގެނެއް ނުދާނެ، އެހެންވީމާ މިއީ ކޮލިޓީގެ މައްސަލައެއް ނޫން، އަޅުގަނޑުމެންނަށް ފެންނަނީ ދުރުން އެއީ އިލޫޝަނެއް، މަސައްކަތް ދަނީ ބްރިޖުގައި އެ ބުނާ ބެންޑުތަކެއް ހުރެގެނެއް ނޫން،“ – މިނިސްޓަރު މުއްޠަލިބް ވިދާޅުވިއެވެ.
މުއްޠަލިބް ވިދާޅުވި ގޮތުގައި، ތިލަމާލެ ބްރިޖް ނިމިގެންދާއިރު އެ ބްރިޖް ވެގެންދާނީ އިމާރަތްކުރުމާއި އިންޖިނިއަރިންގެ އަޖައިބަކަށް ކަމަށާއި ސަބަބަކީ އެއީ އެހައިވެސް ބުރަ އަދި ބޮޑު މަސައްކަތެއް ކަމުގައިވާތީ ކަމަށެވެ. މީގެ އިތުރުން ބްރިޖުގެ މަސައްކަތްތައް އެއްކޮށް ނިންމާލެވި، އަންނަ 2027 ވަނަ އަހަރު މާލެއާއި ވިލިމާލެއާއި ދެމެދު ބްރިޖް މަތިން ދަތުރުކުރަން ފެށޭވަރުވާނެ ކަމަށް ދިވެހި ސަރުކާރުންނާއި އިންޑިއާ ސަރުކާރުން ވަނީ ދީފައެވެ.
އިންޑިއާގެ އެގްޒިމް ބޭންކުގެ ލައިން އޮފް ކްރެޑިޓްގެ ދަށުން ދޫކުރި 400 މިލިއަން ޑޮލަރާއި އިންޑިއާ ސަރުކާރުގެ ހިލޭ އެހީގެ ގޮތުގައި ދޫކުރި 100 މިލިއަން ޑޮލަރުގެ ދަށުން ތަރައްގީކުރާ ތިލަމާލެ ބްރިޖަކީ އެ ގައުމުގެ އިންފްރާންސްޓްރަކްޗަރ ދާއިރާގައި ހަރަކާތްތެރިވާ ކުންފުންޏެއް ކަމަށްވާ އެފްކޮންސްއާއި ހަވާލުކޮށްގެން ކުރިއަށްގެންދާ މަޝްރޫއެކެވެ.
ތިލަމާލެ ބްރިޖުގެ މަސައްކަތް އެފްކޮންސްއާއި ހަވާލުކޮށްފައިވަނީ 2021 ވަނަ އަހަރުގެ ސެޕްޓެމްބަރު މަހުގެ 16 ވަނަ ދުވަހުއެވެ. 2023 ވަނަ އަހަރު ރައީސް ޑރ. މުޢިއްޒު ވެރިކަމާ ހަވާލުވެވަޑައިގަތްއިރު ތިލަމާލެ ބްރިޖުގެ ނިމިފައިވަނީ އެންމެ 29 އިންސައްތަ މަސައްކަތެވެ.
