ހުޅުމާލެ ދެވަނަ ފިޔަވަހިން ގެއްލިގެން ހޯދަމުންދިޔަ 15 އަހަރުގެ އަންހެން ކުއްޖާ، ފުލުހުންނާއި އާއިލާގެ މަސައްކަތުން މިހާރު ފެނިއްޖެއެވެ.
ފުލުހުން ގެއްލިގެން ހޯދަމުން ގޮސްފައިވަނީ މާލެ، ހމ. ފްލެޓްނަންބަރު 05-3-2، ޢާއިޝަތު އަލްޔާ ޢަލީ (15އ) އެވެ. އާއިލާއާ ހަވާލާދީ ފުލުހުން ބުނެފައިވާ ގޮތުގައި، އަލްޔާ މިހާރު ދިރިއުޅެމުންދަނީ ހުޅުމާލެ ދެވަނަ ފިޔަވަހީގެ ހިޔާ ޓަވަރު 16 ގައެވެ.
އަލްޔާ ގެއިން ނުކުމެގެން ގޮސްފައިވަނީ އިއްޔެ ހަވީރު 16:15 އެހާކަންހާއިރުއެވެ. އެ ކުއްޖާގެ ޚަބަރެއް ނުވެގެން އާއިލާގެ ފަރާތުން ފުލުހުންނަށް ރިޕޯޓްކޮށްފައިވަނީ ރޭ ދަންވަރުގެ ވަގުތެއްގައެވެ. މި ރިޕޯޓާ ގުޅިގެން ފުލުހުން ވަނީ ވަގުތުން އެ ކުއްޖާ ހޯދުމުގެ އޮޕަރޭޝަނެއް ފަށައި، ކުއްޖާގެ ފޮޓޯއާއި ވަނަވަރު އާންމުކޮށްފައެވެ.
ކުއްޖާ ގެއިން ނުކުތްއިރު ލައިގެން ހުރީ ހުދުކުލައިގެ ރޮނގުދެމި ކްރޮޕް ޓޮޕަކާއި، މަޑު ނޫކުލައިގެ ޖީންސެއްގެ އިތުރުން ކަޅުކުލައިގެ ޝޯލެކެވެ.
ފުލުހުން މިއަދު ހާމަކުރި އެންމެ ފަހުގެ މައުލޫމާތުގައިވާ ގޮތުން، ގެއްލިގެން ހޯދަމުންދިޔަ ޢާއިޝަތު އަލްޔާ ޢަލީ މިހާރު ވަނީ ފެނިފައެވެ. އަދި އެ ކުއްޖާގެ ހާލު ރަނގަޅު ކަމަށްވެސް ފުލުހުން މައުލޫމާތު ދީފައިވެއެވެ. ނަމަވެސް، ކުއްޖާ ފެނުނު ވަގުތާއި ތަނާ ގުޅޭ އިތުރު ތަފްސީލެއް ފުލުހުން ހާމައެއް ނުކުރެއެވެ.
