ރާއްޖޭގައި 800 އަށް ވުރެ ގިނަ ބޭސް ފިހާރަ ހުރިއިރު، އަދި އާސަންދައިގެ ބަޖެޓުގެ ބޮޑު ބައެއް ފާމަސީތަކުގެ ބިލަށް ދައްކާއިރު ވެސް، ރައްޔިތުންނަށް ބޭނުންވާ ބޭސް ނުލިބުމަކީ މިހާރު ގައުމީ މައްސަލައަކަށް ވެފައިވާ ކަމަށް އާސަންދަ ކުންފުނީގެ މެނޭޖިން ޑިރެކްޓަރު އައިމިނަތު ޒީނިޔާ ވިދާޅުވެއްޖެ އެވެ.
ޒީނިޔާ މިހެން ވިދާޅުވީ، ރާއްޖޭގައި ބޭސް ނުލިބޭ މައްސަލައާ ގުޅިގެން ރައްޔިތުންގެ މަޖިލީހުގެ އެސްއޯއީ ކޮމިޓީން އިއްޔެ ބޭއްވި ބައްދަލުވުމުގައެވެ. މި ބައްދަލުވުމަށް ސަރުކާރުގެ ކަމާގުޅޭ މުއައްސަސާތަކާއި ކުންފުނިތަކުގެ ވެރިން ހާޒިރުކޮށް ވަނީ ސުވާލުކޮށްފައެވެ.
ކޮމިޓީގައި ވާހަކަދައްކަވަމުން ޒީނިޔާ ވިދާޅުވީ، އާސަންދައިގެ ޖުމުލަ ބަޖެޓުގެ ގާތްގަނޑަކަށް 60 އިންސައްތަ ހޭދަކުރަނީ ފާމަސީތަކަށް ބޭހުގެ އަގު ދެއްކުމަށް ކަމަށެވެ. ނަމަވެސް، ބޭސް ސިޓީ ހިފައިގެން ފާމަސީތަކަށް ދިއުމުން ބޭސް ނުލިބޭ ކަމުގެ ޝަކުވާ އާންމުންގެ ފަރާތުން އިންތިހާއަށް ލިބެމުންދާކަން އޭނާ ފާހަގަކުރެއްވިއެވެ.
މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) ގެ އެޕްރޫވްޑް ޑްރަގް ލިސްޓުގައި ހިމެނޭ ހުރިހާ ބޭހަކަށް އާސަންދައިން ކަވަރޭޖު ދިން ނަމަވެސް، އެ ލިސްޓުގައި ހިމެނޭ ގިނަ ބޭސްތައް ރާއްޖެއަށް އެތެރެނުކުރާކަން ވަނީ ހާމަވެފައެވެ. މިގޮތުން އެސްޓީއޯ ފާމަސޫޓިކަލްގެ ޕްލޭނިން މެނޭޖަރު ލިމްޔާ ވިދާޅުވީ، އެޕްރޫވްޑް ލިސްޓުގައި 5000 އެއްހާ ބޭސް ހުއްޓަސް، މިހާރު ރާއްޖެއަށް އެތެރެކުރެވެނީ އެންމެ 1300 ބޭސް ކަމަށެވެ.
ބޭސް ލިބުމަށް ހުރި ހުރަސްތަކާ ގުޅޭގޮތުން ޒީނިޔާ އިތުރަށް ވިދާޅުވީ، ބައެއް ފާމަސީތައް ރަޖިސްޓްރީ ކުރާއިރު އަސާސީ ބޭސްތައް ހުރިތޯ ބެލުމުގެ ނިޒާމު ބަލިކަށި ކަމަށެވެ. އަދި ބޭސް ފިހާރަތަކުގެ ސްޓޮކް ބެލެހެއްޓުމާއި، ރާއްޖެއަށް ބޭސް އެތެރެކުރާ މިންވަރު ދެނެގަނެވޭނެ އެކަށީގެންވާ މެކޭނިޒަމެއް ނެތްކަންވެސް އޭނާ ފާހަގަކުރެއްވިއެވެ.
މީގެ އިތުރުން، ބައެއް ފާމަސީތަކުން ބޭހުގެ އަގުން 500 އާއި 600 އިންސައްތައާ ދެމެދުގެ ބޮޑު ނަފާއެއް ނަގަމުންދާ ކަމަށާއި، މިކަން ކޮންޓްރޯލް ކުރާނެ ނިޒާމެއް ނެތް ކަމަށް ޒީނިޔާ ވިދާޅުވިއެވެ. އަދި އަގުހެޔޮ ބޭސް ދޫކުރުމަށްފަހު އާސަންދައަށް އަގުބޮޑު ބޭހުގެ ބިލް ހުށަހަޅާ މައްސަލަތައް ފާހަގަކުރެވޭ ކަމަށާއި، ބޭސް އެތެރެކުރާ ފަރާތްތަކުން އަމިއްލައަށް ބޭސް ހިފައިގެން އައުމުގެ ސަބަބުން ބާޒާރުގައި ހުންނަ ބްރޭންޑްތައް އަވަސް އަވަހަށް ބަދަލުވާކަންވެސް އޭނާ ފާހަގަކުރެއްވިއެވެ.
މި މައްސަލަތައް ހައްލުކުރުމަށް ’ބަލްކް ޕްރޮކިއުމެންޓް‘ ނިޒާމެއް ތައާރަފުކުރި ނަމަވެސް، އެ ނިޒާމުގެ ތެރެއިން މިހާތަނަށް ގެނެވިފައިވަނީ ވަރަށް މަދު ބޭހެއް ކަމަށް އާސަންދަ ކުންފުނިން ބުނެއެވެ. އަދި ރާއްޖޭގައި ރަޖިސްޓްރީކޮށްގެން ވިއްކާ ހުރިހާ ބޭހަކީވެސް ކޮލިޓީ ކަށަވަރު ކުރެވިފައިވާ ބޭސްތަކެއް ކަމުގެ އިތުބާރު އާސަންދައިން ވަނީ ރައްޔިތުންނަށް ދީފައެވެ.
